BEYNƏLXALQ TƏŞKİLATIN NÜMAYƏNDƏSİ FÜZULİ RAYONUNDA “QUŞ QRİPİ”NƏ DAİR YAYILMIŞ MƏLUMATIN ƏSASSIZLIĞINA ƏMİN OLMUŞDUR

12.01.2007 [20:52]
Çap et
A⁺ A^-

Bir neçə gün bundan əvvəl Dövlət Baytarlıq Xidməti Füzuli rayonunun Böyük Bəhmənli kəndində və İran İslam Respublikası ilə sərhədin bitərəf zonasında ev və çöl quşlarının qırılması ilə bağlı yayılmış xəbərləri təkzib etmişdi.

Qurumun mətbuat mərkəzindən AZƏRTAC-a bildirmişlər ki, bununla bərabər, BMT-nın Ərzaq və Kənd Təsərrüfatı Təşkilatının (FAO) nümayəndəsi doktor Gholan Kiani yayılmış məlumatı yerində yoxlamaq məqsədi ilə yanvarın 12-də həmin kənddə ayrı-ayrı həyətlərdə olmuş, sakinlərlə görüşmüşdür. O, həmçinin sərhəddəki bitərəf zonaya da baş çəkmişdir.

Beynəlxalq təşkilatın nümayəndəsi bir daha əmin olmuşdur ki, yayılan məlumatların heç bir əsası yoxdur.