BİR QRUP İDMAN XADİMİNƏ FƏXRİ ADLAR VƏ DƏRƏCƏLƏR VERİLMİŞDİR
AZƏRTAC xəbər verir ki, iyulun 24-də Gənclər və İdman Nazirliyində bir qrup idman xadiminə müxtəlif fəxri ad və dərəcələr təqdim olunmuşdur.
Bununla bağlı keçirilən tədbirdə gənclər və idman nazirinin müavini İsmayıl İsmayılov ölkədə idmanın inkişafı sahəsində xidmət göstərmiş hər bir mütəxəssisə daim diqqət və qayğı ilə yanaşıldığını, onların fəaliyyətlərinin layiqincə qiymətləndirildiyini xatırlatmışdır.
Daha sonra idmanın müxtəlif sahələrində əldə etdikləri uğurlara görə Hidayət Mehdiyev, Şakir Abdullayev, Novil İsmayılov, Elxan Əhmədov, Şəkərxan Əlismanov, Misir Xudaverdiyev, Fikrət Pəncəliyev, Səlhət Abbasova, Mübariz Babayev, Əli Musazadə, Səmədəli Əsədov, “Fəxri bədən tərbiyəsi və idman işçisi”, Namiq Abdullayev, İsa Xəlilov, Anar Allahverdiyev, Bəbəş Quliyev, Çingiz Əhmədov, Liliya Drujkina, Oleq Həşimov, “Əməkdar məşqçi”, Elmar Babanlı, Nurəli Məmmədzadə, İrina Taliaşvili, İrana Qurbanova, Yadigar Məmmədov, Könül Mikayılova, Firudin Ələsgərov, Kür Səfərəliyev “Respublika dərəcəli hakim” fəxri adları ilə, İbad Məmmədzadə, Şəhanə Alməmmədova, Adil Quliyev isə “İdman ustası” dərəcəsi ilə təltif olunmuşlar.
Yüksək adlara layiq görüldükləri üçün minnətdarlıq edən mərasim iştirakçıları Azərbaycanda idmana göstərilən diqqət və qayğının nəticəsi kimi son illər respublikamızın bu sahədə xeyli irəliləyişə nail olduğunu vurğulamış, idmanın inkişafı naminə bundan sonra da əllərindən gələni əsirgəməyəcəklərini bildirmişlər.
Bölmənin digər xəbərləri
