“BİRLİK-YEDİNENİYE” XALQLARIMIZIN BİRLİYİNƏ XİDMƏT EDİR
Ümumrusiya Azərbaycan Konqresinin (ÜAK) Voronej regional şöbəsinin və “Birlik-Yedineniye” Cəmiyyətinin sədri İlham Kazımov AZƏRTAC-ın müxbiri ilə söhbətində bildirmişdir ki, qurum, həmçinin Azərbaycanla Rusiyanın ayrı-ayrı vilayətləri arasında əlaqələrin genişləndirilməsində, diaspor təşkilatlarının imkanlarından istifadə edərək lobbiçiliyin daha da inkişaf etdirilməsində xüsusi rol oynayır. Məlumdur ki, bu gün Rusiyaya müxtəlif ölkələrdən, o cümlədən Azərbaycandan çoxlu adam gəlir. Onların fəaliyyətini tənzimləmək üçün Dövlət Duması müxtəlif qanunlar qəbul edir. “Birlik – Yedineniye” Cəmiyyəti azərbaycanlıların hüquqlarını maksimum müdafiə etmək məqsədi ilə Voronejin Liskis, Ramon, Pavlovski, Rossos rayonlarında xüsusi bürolarını açmışdır. Bu bürolar həm də azərbaycanlıların işlə təmin olunmalarında xüsusi rol oynayır. Cəmiyyət Voronej vilayətinin qubernatoru, meri, digər rəsmiləri, müxtəlif iş adamları, eləcə də Rusiya Federasiyasının nazirləri, deputatları ilə sıx əlaqə yaratmışdır. Voronejdə digər milli qurumlarla müqayisədə “Birlik-Yedineniye” Cəmiyyətinə xüsusi rəğbət vardır. Bunun ən başlıca səbəblərindən biri Azərbaycan Prezidenti İlham Əliyevin həyata keçirdiyi mehriban qonşuluq siyasətidir. Azərbaycanda digər millətlərdən olan insanlara qarşı heç bir ayrı-seçkilik yoxdur, siyasi, iqtisadi sabitlik hökm sürür. Bunu onlar da görür, dərk edirlər. Məhz bunun nəticəsidir ki, vilayətin təyyarəqayırma, traktor və digər zavodlarının, turizm şirkətlərinin ölkəmizə marağı artmışdır. Həmin müəssisələrin nümayəndələri Bakıda olmuş və bir sıra müqavilələr bağlamışlar.
Hazırda Bakı ilə Voronejin qardaşlaşması, birbaşa hava və dəmir yolu reyslərinin açılması barədə danışıqlar gedir. Eləcə də təhsil sahəsində əlaqələr yaratmaq istəyirik. Bu gün bir neçə azərbaycanlı Voronejin ayrı-ayrı universitetlərində, voronejlilərin nümayəndələri isə Bakıda təhsil alırlar. Voronejdə Bakı Şəhər İcra Hakimiyyətinin rəsmi nümayəndəliyi açılmışdır.
Voronej şəhərində və digər rayonlarda Azərbaycan məktəbləri, kitabxana və mədəniyyət mərkəzləri fəaliyyət göstərir. “Birlik” jurnalı və qəzeti nəşr olunur. Digər diaspor təşkilatları ilə sıx əməkdaşlıq edilir. Milli bayramlarımızda, adət-ənənələrimizlə bağlı digər tədbirlərdə yəhudi, gürcü, Ukrayna və başqa xalqların diaspor təşkilatları yaxından iştirak edirlər.
Görülən bütün işlərdə ÜAK və Azərbaycan Respublikasının Xarici Ölkələrdə Yaşayan Azərbaycanlılarla İş üzrə Dövlət Komitəsinin yaxından köməyi olmuşdur. Əlbəttə, müəyyən problemlər də mövcuddur. Çalışırıq ki, Komitənin və ÜAK-ın köməyi ilə həmin problemləri də həll edək. Dövlət Komitəsi və Azərbaycan Respublikasının Mədəniyyət Nazirliyi ilə əldə olunmuş razılığa görə gələn il Voronejdə Azərbaycan mədəniyyəti günləri keçiriləcəkdir.
Bölmənin digər xəbərləri
