BMT rəhbəri: Paris Sazişi çərçivəsində verilən vədləri yerinə yetirməyimiz bütün bəşəriyyət üçün vacibdir
Bakı, 1 oktyabr, AZƏRTAC
Qlazqoda keçiriləcək beynəlxalq iqlim konfransından bir ay əvvəl BMT-nin baş katibi Antonio Quterreş bütün ölkələri hazırkı nəslin iqlim fəlakətinin mərkəzində olduğunu etiraf etməyə çağırıb. O, Paris Sazişində təsbit edilmiş bütün öhdəliklərin yerinə yetirilməsini - istixana qazı tullantılarını azaltmaq, iqlim dəyişikliyi ilə mübarizə üçün hər il inkişaf etməkdə olan ölkələrə 100 milyard dollar ayırmaq və qlobal istiləşmənin təsirlərinə uyğunlaşmaq üçün tədbirləri gücləndirməyi təkidlə tövsiyə edib.
"Paris konfransından sonra ən əhəmiyyətli iqlim konfransı olan İqlim dəyişmələri üzrə BMT-nin Çərçivə Konvensiyası tərəflərinin konfransının 26-cı sessiyasına (TK-26) cəmi bir ay qalıb. AZƏRTAC BMT-nin Xəbərlər xidmətinə istinadla xəbər verir ki, BMT rəhbəri Qlazqo sammitinə hazırlıqla bağlı Milanda keçirilmiş nazirlər toplantısının iştirakçılarına müraciət edərək deyib: “Paris Sazişi çərçivəsində verilən vədləri yerinə yetirməyimiz bütün bəşəriyyət üçün vacibdir”.
Noyabr ayında bu Şotlandiya şəhərində TK-26 kimi tanınan Beynəlxalq İqlim konfransı keçiriləcək, burada ölkələr iqlim dəyişikliyinin qarşısının alınması üzrə yenilənmiş, ehtimala görə, daha radikal planlar təqdim etməlidirlər.
Antonio Quterreş xatırladıb ki, Parisdə dövlətlər istiləşməni sənayeləşdirmədən əvvəlki səviyyədən 1,5 dərəcə yuxarı saxlayacaqlarını vəd ediblər. Lakin milli planlarda təsbit olunmuş hazırkı öhdəliklərlə artıq bu əsrin sonuna qədər temperatur 2,7 dərəcə yüksələ bilər.
BMT rəhbəri, COVID-19 pandemiyasının yaratdığı çətinliklərə baxmayaraq, istixana qazı emissiyalarının azaldılması üzrə daha iddialı milli planlarını açıqlayan inkişaf etməkdə olan ölkələrin qərarlarını alqışlayıb. "Lakin biz 1,5 dərəcə hədəfə, yalnız qlobal emissiyaların 80 faizini təşkil edən bütün G20 ölkələrinin yeni və ya yenilənmiş milli planlarında daha qətiyyətli hərəkətlər etməyi öhdələrinə götürdükləri təqdirdə nail ola bilərik", - deyə Antonio Quterres əlavə edib. O, Paris Sazişində təsbit edilmiş ümumi, lakin fərqli məsuliyyət prinsipi barədə xatırladıb.
"Bütün liderlər iqlim fəlakətinin mərkəzində olduğumuzu etiraf etməlidirlər. Sənaye nöqteyi-nəzərdən inkişaf etmiş ölkələr təşəbbüsü üzərlərinə götürməlidirlər. Lakin hamı hərəkət etməlidir", - deyə Antonio Quterres bildirib. O vurğulayıb ki, iqtisadiyyatı keçid dövründə olan ölkələr də istixana qazı tullantılarının azaldılmasında daha fəal olmalıdırlar.
“İlk növbədə kömürlə işləyən yeni elektrik stansiyalarının inşasından imtina etmək lazımdır. Son bir ildə uzun bir yol qət edə bilmişik. Lakin 2030-cu ilə qədər İqtisadi Əməkdaşlıq və İnkişaf Təşkilatı (İƏİT) ölkələrində və 2040-cı ilə qədər dünyanın qalan hissəsində kömürdən imtina etmək üçün hələ çox iş görməliyik", - deyə BMT-nin Baş katibi vurğulayıb.
O, Çinin, kömür energetikasının beynəlxalq maliyyələşdirilməsinin dayandırılması ilə bağlı son bəyanatını alqışlayıb və kommersiya banklarından tutmuş ABŞ, Avropa və Asiya - Sakit Okean bölgəsi daxil olmaqla aktiv idarəçilərinə qədər özəl maliyyə qurumlarını bundan nümunə götürməyə və kömür energetikasının maliyyələşdirilməsini dayandırmağa çağırıb.
Onun sözlərinə görə, bu gün bu məsələyə çox az diqqət yetirilir və onun həlli üçün kifayət qədər vəsait ayrılmır. O, inkişaf etməkdə olan ölkələrin uyğunlaşma tədbirlərinə hər il 70 milyard dollara ehtiyacı olduğunu və 2030-cu ilə qədər bu məbləğin 300 milyard dollara çatacağını xatırladıb. Antonio Quterreş deyib ki, bu məsələyə məhəl qoyulmaması, daha çox sayda insan ölümü və təbii fəlakətlər nəticəsində infrastrukturun kütləvi şəkildə dağıdılmasına gətirib çıxaracaq.
"Burada, Milanda bir neçə günümüz var və sonra Qlazqoya qədər bir ay ərzində iş görməliyik. Mən hər kəsi bu vaxtdan məntiqlə və səmərəli istifadə etməyə çağırıram. TK-26 konfransının hamı üçün uğurlu olması üçün lazım olan inamı bərpa edək", - deyə Antonio Quterreş bildirib.
"Biz gələcəyə yüksək əxlaqi baxımdan baxmalıyıq ki, indiki və gələcək nəsillər hər kəsin sağlam bir planetdə layiqli bir həyat yaşamaq şansına sahib olacağı bir dünyaya ümid edə bilsinlər", - deyə BMT rəhbəri bildirib və xəbərdarlıq edib ki, “vaxt tükənir və vəziyyət gərginləşir”.
Bölmənin digər xəbərləri
