AZƏRTAC xəbər verir ki, mayın 3-də qeyd edilən Beynəlxalq mətbuat azadlığı günü ərəfəsində, ənənəyə uyğun olaraq, BMT kütləvi informasiya vasitələrində lazımınca işıqlandırılmayan “unudulmuş xəbərlər”in siyahısını açıqlamışdır.

Bu il “Dünyanın daha çox məlumatlandırılmalı olduğu on hadisə və problem”in siyahısına Uqandada yetkinlik yaşına çatmayanların vətəndaş müharibəsinə göndərilməsi, Afrikanın cənubunda QİÇS epidemiyasına görə yetim qalmış 12 milyon uşağın acınacaqlı vəziyyəti, sülhün bərqərar edilməsində qadınların rolu, yerli xalqların və əlillərin problemləri, dənizlərin bioloji müxtəlifliyinin pozulması barədə xəbərlər daxil edilmişdir.

BMT baş katibinin informasiya məsələləri üzrə müavini Şaşi Txarur aprelin 30-da Nyu-Yorkda mətbuat konfransında bildirmişdir ki, siyahıya təkcə naməlum problemlər deyil, həm də naməlum uğurlar daxildir. O, Tacikistanın milli həmrəylik və barışıq sahəsində nailiyyətini naməlum uğurlar sırasına aid edərək demişdir ki, amma bu ölkənin viranedici vətəndaş müharibəsindən sonra ağlasığmaz çətinlikləri uğurla aradan qaldırması kütləvi informasiya vasitələrində, demək olar, işıqlandırılmır.