Sofiya, 12 may, AZƏRTAC

Azərbaycan xalqının ümummilli lideri Heydər Əliyevin anadan olmasının 97-ci ildönümü Bolqarıstan mətbuatında geniş işıqlandırılıb.

Bolqarıstanın nüfuzlu “24 Chasa” qəzetinin internet səhifəsində Azərbaycan-Bolqarıstan əlaqələrinin təşəkkülündə Ulu Öndərin roluna dair məqalə dərc olunub. “Uğurların təməli - Heydər Əliyev və xeyirxah missiyasının davamı” adlı məqalədə qeyd edilir ki, dahi siyasi xadimin fəaliyyətinin nəticəsində iki ölkənin hazırkı strateji tərəfdaşlığına zəmin formalaşıb. Məqalədə Azərbaycanın dövlət müstəqilliyini yenidən qazanmasından sonra əməkdaşlıq əlaqələri üçün yeni imkanların açıldığı qeyd olunaraq əlaqələrimizin təşəkkülündə ümummilli lider Heydər Əliyevin tarixi missiyası vurğulanıb. Qeyd olunub ki, elə dahi şəxsiyyətlər var ki, mənsub olduqları xalqın tarixi təkamülünə məzmun verirlər, fəaliyyətləri ilə milyonlara öndərlik edirlər. Onlar yalnız bir xalqa deyil, bütövlükdə bəşər tarixinə töhfə verirlər. Azərbaycan xalqının böyük oğlu, görkəmli dövlət xadimi, ulu öndər Heydər Əliyev məhz bu cür şəxsiyyətlərdən olub. Sözün həqiqi mənasında, o, müasir Azərbaycanın tarixi təkamülünə yeni nəfəs verib. Liderlik istedadı və qabiliyyəti ilə Heydər Əliyev müstəqil Azərbaycan dövlətçiliyinin qurucusu, siması və hərəkətverici qüvvəsi olub. Məhz Heydər Əliyevin fəaliyyəti Azərbaycan-Bolqarıstan əlaqələrinin də inkişafına yeni məzmun qazandırıb.

Daha sonra məqalədə Bolqarıstan Respublikasının o vaxtkı Prezidenti Jelyu Jelyevin dəvəti ilə Azərbaycan Respublikasının Prezidenti Heydər Əliyevin 1995-ci il iyunun 29-30-da Bolqarıstana rəsmi səfərə gəlməsindən bəhs olunub. Məhz Ulu Öndərin həmin rəsmi səfərinin iki ölkə arasında əməkdaşlıq münasibətlərinin yeni mərhələyə qədəm qoymasına zəmin hazırladığı ifadə olunub. Səfər zamanı ulu öndər Heydər Əliyev və Jelyu Jelevin bir çox sahədə əlaqələrin yaradılmasını nəzərdə tutan dostluq və əməkdaşlıq haqqında müqavilə imzaladıqları vurğulanıb. Prezident Heydər Əliyevin Bolqarıstan parlamentində olduğu və Xalq Məclisində çıxış edərək yeni müstəqillik qazanmış dövlət kimi Azərbaycanın üzləşdiyi çətinliklər və Ermənistan-Azərbaycan münaqişəsi barədə, həmçinin ölkədə keçirilən islahatlar haqqında bolqar parlamentarilərinə məlumat verdiyi bildirilib. Səfərin tarixi əhəmiyyətinə toxunulan məqalədə, həmçinin sabiq dövlət başçıları Petar Stoyanov və Georgi Pırvanovun Ulu Öndər haqqında xoş fikirləri xatırlanıb. Məqalədə ulu öndər Heydər Əliyevin Bolqarıstana səfəri və dost ölkənin yüksək səviyyəli dövlət rəsmiləri ilə görüşlərinin nəinki gələcək əməkdaşlığımızı təşviq etdiyi, hətta strateji tərəfdaşlığımıza zəmin hazırladığı qənaətinə gəlinib. Bildirilib ki, 2015-ci il tarixli “Azərbaycan Respublikası ilə Bolqarıstan Respublikası arasında strateji tərəfdaşlıq haqqında Birgə Bəyannamə” təkcə strateji tərəfdaşlığımızın deyil, eyni zamanda, dost Bolqarıstanla əməkdaşlığımızın möhkəmləndirilməsi və inkişaf etdirilməsi üçün möhkəm hüquqi zəmin yaradıb. Bolqarıstanın beynəlxalq hüququn ümumi qəbul edilmiş prinsiplərindən biri kimi sərhədlərin toxunulmazlığı prinsipinə uyğun olaraq Azərbaycan Respublikasının suverenliyini və ərazi bütövlüyünü dəstəklədiyi vurğulanıb.

Məqalədə Heydər Əliyevin anadan olmasının 97-ci ildönümünün qeyd olunduğu xatırlanaraq dahi dövlət xadiminin adının yalnız onun siyasi fəaliyyəti ilə məhdudlaşmadığı bildirilib. Vurğulanıb ki, Ulu Öndərin vəfatından sonra onun zəngin irsinin qorunub saxlanması və gələcək nəsillərə çatdırılması məqsədilə xüsusi bir ictimai qurumun yaradılmasına dair müxtəlif təşəbbüslər irəli sürülüb. Azərbaycan cəmiyyətinin sosial sifarişi nəzərə alınaraq 2004-cü ilin mayında qeyri-hökumət təşkilatı olan Heydər Əliyev Fondu yaradılıb. Fondun əsas missiyası Heydər Əliyevin həyat və fəaliyyətinin, ideyalarının öyrənilməsi və təbliği ilə yanaşı, ölkə daxilində və xaricdə sosial-iqtisadi və humanitar inkişafı dəstəkləməkdir. Fondun əsas fəaliyyət istiqamətlərindən biri kimi ölkə və dünya əhəmiyyətli tarixi abidələrin bərpası, yeni mədəniyyət ocaqlarının yaradılması, bir sözlə, ümumbəşəri dəyərlərin mühafizəsi olduğu qeyd olunaraq onun mötəbər fəaliyyətləri sadalanıb. Mövzu kontekstində 2007-ci ildə Versal Sarayının parkındakı ümumbəşəri abidələrin, 2008-ci ildə Luvr Muzeyinin, 2011-ci ildə İkinci Dünya müharibəsi zamanı yanmış və dağıdılmış Berlin qəsrinin, 2012-ci ildə Vatikanda Roma katakombalarının bərpası, 2013-cü ildə Romada Kapitolini Muzeyinin filosoflar zalının təmiri və digər fəaliyyətlər sadalanıb. Məmnuniyyət hissi ilə qeyd olunub ki, Heydər Əliyev Fondunun həmin təqdirəlayiq fəaliyyəti dost Bolqarıstandan da yan keçməyib. Fond Şərqi Avropada ilk sərmayəsi üçün tarixi Veliko Tırnovo şəhərini seçib və “Trapezitsa” qalasını dünya xəzinələri üçün mədəniyyət abidələri siyahısına daxil edib. Nəticədə Heydər Əliyev Fondunun dəstəyi ilə “Trapezitsa” Memarlıq Muzeyi Qoruğunda bərpa işləri həyata keçirilib. 2016-cı il sentyabrın 22-də isə Azərbaycanın birinci xanımı, Heydər Əliyev Fondunun prezidenti Mehriban Əliyeva və Fondun vitse-prezidenti Leyla Əliyeva Baş Nazir Boyko Borisovla birgə “Trapezitsa” Memarlıq Muzeyi Qoruğunun açılış mərasimində və dost Bolqarıstanın Müstəqillik Günü ilə bağlı tədbirlərdə iştirak ediblər.

Sonda vurğulanıb ki, bu gün Azərbaycan xalqı ulu öndər Heydər Əliyev tərəfindən əsası qoyulmuş Azərbaycan-Bolqarıstan əlaqələrinin perspektivlərindən nikbindir və iki xalqın və dövlətin ortaq maraqlarının əlaqələrin böyük gələcəyinin təminatçısı olduğuna inanır. Azərbaycan və Bolqarıstan xalqları arasındakı dostluq əlaqələrinin dönməzliyi, eləcə də iki ölkənin sarsılmaz əməkdaşlığının hər keçən gün dərinləşməsi qeyd olunub. Məqalədə Heydər Əliyevin Bolqarıstana rəsmi səfərinə dair şəkillərlə yanaşı, Heydər Əliyev Fondu və “Trapezitsa” Memarlıq Muzeyi Qoruğunun birgə markasına da yer verilib.

Bolqarıstanın nüfuzlu “Fokus” xəbər agentliyinin “Dünya tarixdə bu gün” seriyasında 10 may tarixinə olan məlumatda Heydər Əliyev şəxsiyyətinə geniş yer ayrılıb. Dünyanın tanınmış böyük siyasi və dövlət xadimlərindən biri, Azərbaycan Respublikasının üçüncü Prezidenti kimi təqdim olunmuş Heydər Əliyevin Azərbaycanda “Ulu Öndər” və “Azərbaycan xalqının Ümummilli Lideri” adlarının daşıyıcısı olduğu vurğulanıb. Məlumatda dahi siyasi xadimin SSRİ dövründə və müstəqillik illərindəki siyasi fəaliyyətinə nəzər salınıb, tarixi xidmətləri sadalanıb, layiq görüldüyü orden, medal, mükafat və fəxri adlar qeyd olunub. Azərbaycanda Heydər Əliyevin xatirəsini əbədiləşdirmək üçün Heydər Əliyev Fondunun, “Heydər Əliyev” ordeninin təsis olunması, Azərbaycan Ali Hərbi Məktəbi, Bakı Beynəlxalq Hava Limanı, Respublika Sarayı, Bakı şəhərində İdman-Konsert Kompleksi, ölkənin şəhər və rayonlarında küçə və meydanların, bir sıra ölkələrdə isə küçələrin onun şərəfinə adlandırılması və abidələr ucaldılması vurğulanıb.

İqbal Hacıyev

AZƏRTAC-ın xüsusi müxbiri

Sofiya