Bolqarıstanda vətəndaşların xaricə axınının qarşısını almaq üçün torpaqlar pulsuz paylanılır
Sofiya, 4 noyabr, AZƏRTAC
Bolqarıstanın Svilenqrad şəhəri əhalinin xaricə axınından xilas olmaq və bununla da yeni sakinləri cəlb etmək üçün daşınmaz əmlak və yarımçıq evlərin tikintisi üçün boş torpaq sahələri paylayacaq. Bu gün Bolqarıstanda əhalinin sayı dünyanın bir çox ölkələrindən daha sürətlə azalır. XXI əsrin əvvəllərində Svilenqrad şəhərində 19 mindən çox insan yaşayıb. Halbuki hazırda orada 16 mindən çox insan yaşayır. Buna görə də, yeni sosial proqram gənc ailələr və təcrübəsiz mütəxəssislər üçün nəzərdə tutulub. Yerli hakimiyyət bu tədbirlə əhalinin xaricə axınının öhdəsindən gəlmək istəyir. Şəhər rəhbərliyinin qarşısına qoyduğu digər məqsəd daşınmaz əmlak bazarında təklifi artırmaqdır. Şəxsi mənzili olmayanlar torpaq sahəsini pulsuz ala biləcəklər. Portalın məlumatına görə, gələcək sakinlər ən qısa zamanda yaşayış binalarının tikintisinə başlamaq üçün tikinti sahəsi ilə yanaşı, bütün lazımi icazələri və təsdiq edilmiş memarlıq planını özündə əks etdirən sənədlər paketi də alacaqlar. Proqramın birinci mərhələsi səkkiz torpaq sahəsinin paylamasını özündə əhatə edir. Təşəbbüs uğurlu olarsa, proqram davam edəcək.
İqbal Hacıyev
AZƏRTAC-ın xüsusi müxbiri
Sofiya
Bölmənin digər xəbərləri
