Bosniya və Herseqovinada Azərbaycanın Müstəqillik Günü qeyd olunub
Sarayevo, 29 may, AZƏRTAC
Ölkəmizin Bosniya və Herseqovinadakı səfirliyi 28 May - Müstəqillik Günü və Azərbaycan ilə Bosniya və Herseqovina arasında diplomatik əlaqələrin qurulmasının 30 illiyi münasibətilə şəhərin tarixi mərkəzində - Sarayevo meriyasının binasında qəbul və konsert təşkil edib.
AZƏRTAC xəbər verir ki, bayram tədbirində Bosniya və Herseqovinanın Baş nazirinin birinci müavini, müdafiə naziri Zukan Helez, ölkədə yerləşdirilən beynəlxalq təhlükəsizlik qüvvəsinin – EUFOR-un komandanı, general-mayor Tibor Szabo, Bosniya və Herseqovinada fəaliyyət göstərən diplomatik korpusun, dövlət qurumlarının, parlamentin, ictimai, mədəni və işgüzar dairələrin, Sarayevoda yerləşən tədqiqat mərkəzlərinin, media rəhbərləri və təmsilçiləri, soydaşlarımız və bu ölkə ali məktəblərində təhsil alan tələbələrimiz iştirak ediblər.
Azərbaycanın Bosniya və Herseqovinadakı səfiri Vilayət Quliyev çıxış edərək 107 il əvvəl mayın 28-də müsəlman dünyasında ilk parlament respublikasının - Azərbaycan Cümhuriyyətinin qurulması, onun qısamüddətli mövcudluğu ərzində keçdiyi müstəqillik yolu və ölkəmizi beynəlxalq hüququn subyektinə çevirməsi haqqında danışıb. Diplomat Prezident İlham Əliyevin rəhbərliyi ilə Azərbaycanın ərazi bütünlüyünün birmənalı şəkildə bərpa olunduğunu, bu gün müstəqil, suveren və demokratik ölkəmizin Cümhuriyyətin arzu və ideallarını reallığa çevirdiyini, beynəlxalq ictimaiyyətin nəzərində etibarlı tərəfdaş kimi tanındığını vurğulayıb.
Bu ilin Azərbaycan üçün səciyyəvi olan daha bir cəhətini də qeyd edən səfir Azərbaycan Respublikası Prezidentinin Sərəncamı ilə 2025-ci ilin ölkəmizdə “Konstitusiya və Suverenlik İli” elan olunduğunu qonaqların diqqətinə çatdırıb. Bunun müasir mərhələdə dövlət institutlarının fəaliyyətinin daha da təkmilləşdirilməsi baxımından mühüm addım olduğu qeyd edilib.
Daha sonra iki ölkə arasındakı münasibətlərdən bəhs edən Vilayət Quliyev son bir ilə yaxın müddət ərzində Bosniya və Herseqovina Rəyasət Heyətinin üzvləri Denis Beçiroviçin və xanım Jelka Tsvianoviçin, eləcə də müdafiə və energetika nazirlərinin, habelə bir sıra rəsmi və işgüzar heyətlərin Azərbaycana səfərlərini qeyd edib və ikitərəfli əməkdaşlığın inkişafından danışıb.
Tədbirin bədii hissəsində qonaqlara Bakı Musiqi Akademiyası və bir sıra Avropa musiqi məktəblərində təhsil almış azərbaycanlı pianoçu Jalə Rəsulova və skripka ifaçısı Fərid Feyzullayevin ifasında Üzeyir Hacıbəyli, Fikrət Əmirov, Tofiq Quliyev, Arif Məlikov, Vaqif Mustafazadə, eləcə də dünya klassiklərinin repertuarlarından musiqilər ifa olunub. Sarayevo meriyasının dövlət tədbirləri keçirilən əsas zalında təşkil olunmuş qəbul və konsert proqramı böyük maraqla qarşılanıb, Azərbaycan dövlətinin ilbəil artan nüfuz və qüdrətinin, eləcə də ölkəmizin mədəniyyətinin zənginliyinin nümayişinə çevrilib.
Nihad Budaqov
AZƏRTAC-ın xüsusi müxbiri
Sarayevo
Bölmənin digər xəbərləri
