Britaniya ABŞ-dan idxal olunan kənd təsərrüfatı məhsullarının rüsumunu azaldacaq
Bakı, 14 may, AZƏRTAC
Böyük Britaniya hökuməti ABŞ-dan idxal olunacaq kənd təsərrüfatı məhsullarının rüsumunu aşağı salmağı planlaşdırır.
AZƏRTAC “Financial Times” qəzetinə istinadla xəbər verir ki, krallığın Xarici Ticarət Nazirliyi yaxın aylarda ABŞ-a təqdim olunacaq “böyük güzəştlər paketi” hazırlayır. London bu addımla Vaşinqtonla azad ticarət barədə saziş üzrə danışıqlarda irəliləyişə nail olacağını düşünür.
Bununla yanaşı, Britaniya parlamentinin bəzi üzvləri həmin planın yerli kənd təsərrüfatına mənfi təsir göstərəcəyindən ehtiyatlanır. Bu məsələdə Xarici Ticarət naziri Elizabet Trassın əsas opponenti Ətraf Mühitin Mühafizəsi, Ərzaq və Kənd Təsərrüfatının İnkişafı naziri Corc Yustis və Lankaster hersoqluğunun kansleri (Xüsusi Tapşırıqlar üzrə nazir) Maykl Qouvdur.
Bir müddət öncə Britaniya hökuməti London və Vaşinqtonun azad ticarət barədə sazişin imzalanması üzrə məsləhətləşmələrin tempini sürətləndirmək niyyətində olduqlarını bildirib. Mayın 5-də başlayan və hər iki tərəfdən yüzə yaxın nümayəndənin iştirak etdiyi danışıqların ilk mərhələsi iki həftə davam edəcək.
Birləşmiş Krallıqla ABŞ arasında ticarət danışıqları Böyük Britaniyanın fevralın 1-də 47 il üzvlükdən sonra Avropa İttifaqını tərk etməsindən sonra başlayıb. Bu, Londona bütün dünya ölkələri ilə ticarət sazişləri bağlamaq imkanı verir.
Qeyd edək ki, 2018-ci ildə Britaniya ABŞ-a 123,5 milyard funt-sterlinq (160 milyard dollar) həcmində mal ixrac edib, bu ölkədən idxal həcmini isə 78 milyard funt-sterlinqə (101 milyard dollar) çatdırıb.
Bölmənin digər xəbərləri
