Britaniya hökuməti təcili iclas keçirəcək
London, 28 iyul, AZƏRTAC
Böyük Britaniyanın Baş naziri Kir Starmer kabinet üzvlərini yay tətilindən geri çağıraraq Qəzza zolağındakı humanitar böhranla bağlı təcili iclas keçirməyə qərar verib.
AZƏRTAC “Independent”ə istinadla xəbər verir ki, bu addım Fələstin dövlətini tanımaq üçün son günlər Britaniya hökumətinə artan daxili və beynəlxalq təzyiqlərin fonunda atılıb. Nazirlər Kabinetinin üzvləri rəsmi olaraq sentyabrın 1-dək tətilə çıxsalar da, bu həftə Yaxın Şərqdəki vəziyyəti müzakirə etmək üçün bir araya gələcəklər.
Təcili iclas qərarı ABŞ və İsrailin Qətərdə aparılan sülh danışıqlarından nümayəndə heyətlərini geri çağırmasından sonra verilib. Ağ Evin xüsusi elçisi Stiv Vitkof danışıqların dayanmasına görə HƏMAS-ı ittiham edərək, onların razılığa gəlmək istəyi olmadığını bildirib.
Hazırda İsrail sıx məskunlaşılan üç ərazidə BMT-nin humanitar yardım karvanlarının ehtiyac içində olan fələstinlilərə çatmasına şərait yaratmaq üçün hərbi əməliyyatlarda fasilə verməyi vəd edib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
