BRİTANİYANIN XARİCİ İŞLƏR NAZİRİ AVROPA LİDERLƏRİNİ İSLAM HAQQINDA DAHA ÇOX MƏLUMAT ALMAĞA ÇAĞIRMIŞDIR

01.04.2006 [19:55]
Çap et
A⁺ A^-

AZƏRTAC Britaniya KİV-lərinə istinadla xəbər verir ki, bu ölkənin xarici işlər naziri Cək Stro Avropa ölkələrinin hökumətlərini İslam barədə daha çox məlumat almağa və dinindən asılı olmayaraq, hər bir vətəndaşın hüquqlarını müdafiə etməyə çağırmışdır. “Müslüm nyus” nəşrinin Londonda təşkil etdiyi İslam aləmi ilə qarşılıqlı anlaşmaya töhfə vermiş müsəlmanların mükafatlandırılması mərasimində çıxış edən nazir demişdir ki, Avropa ölkələrinin hökumətləri konfessiyaların müxtəlifliyi nəzərə alınan şərait yaratmalıdırlar.

O demişdir ki, Avropanın “dünyəviliyi” barədə təsəvvürlər çox şişirdilmişdir. Məsələn, əhalinin sonuncu siyahıya alınmasına görə, Böyük Britaniya əhalisinin 70 faizi özünü xristian sayır. Qitənin digər ölkələrində də vəziyyət eynidir. Hətta dövlətin dünyəviliyi barədə bəyannamələrlə məşhur olan Fransada 1905-ci ilədək tikilmiş kilsələr və sinaqoqlar büdcə vəsaiti hesabına saxlanır.

Stronun sözlərinə görə, Avropanın tarixi dini dəyərlərin dünyəvi dəyərlərlə əvəz olunması tarixi deyildir. Qitənin ölkələri dini tələblərlə müasirliyi bir-birinə uyğunlaşdırırlar.

Müsəlman icmasına gəldikdə isə, Britaniya XİN-in başçısı vurğulamışdır ki, bu icma Avropada həmişə olmuşdur. Lakin son illər müsəlmanların sayı nəzərəçarpacaq dərəcədə artmışdır. Müsəlmanlar öz dininin tələblərinə ciddi surətdə əməl etmələri ilə fərqlənirlər.

Bu mənada nazir Məhəmməd Peyğəmbərə karikaturalar dərc etmiş Avropa nəşrlərini pisləyərək, müsəlmanların dini hissləri ilə hesablaşmağa çağırmışdır.