BUDAPEŞT MƏHKƏMƏSİ APRELİN 13-DƏ RAMİL SƏFƏROVUN İŞİ ÜZRƏ HÖKM ÇIXARACAQ
İclasın əvvəlində A.Vaşkuti bildirmişdir ki, o, Ramil Səfərovun təhlükəsizliyinin təmin olunması xahişi barədə Azərbaycanın səfiri Həsən Həsənovun məktubunu alaraq, - bu, R.Səfərovun öldürülməsinə görə mükafat təyin edildiyi barədə Ermənistan mətbuatında yazılar verilməsi ilə bağlı idi, - təhlükəsizlik tədbirləri görülməsi üçün Macarıstan Həbsxanalar İdarəsinə müraciət etmişdir. Ona görə də məhkəmə salonunda avtomatlı mühafizəçilər dururlar.
Sonra doktor A.Vaşkuti Q.Marqaryanın öldürülməsi ilə bağlı zərərə görə 25 milyon forint (təxminən 120 min dollar) məbləğində kompensasiya ödənilməsi tələbi barədə erməni tərəfinin Azərbaycan tərəfinə iddiasını oxudu.
Hakim dördüncü ekspertizanın nəticələrinə aid şərhləri elan etdi. Ekspertiza qətli törədərkən R.Səfərovun sarsıntı vəziyyətində olduğu barədə əvvəlki versiyanı təsdiqləmişdir.
Səfərovun 30 il müddətinə azadlıqdan məhrum olunmasını tələb edən prokuror Veronika Kişin çıxışından sonra müdafiə üçün söz R.Səfərovun vəkili doktor Dyörd Madyara verildi. Məhkəmə və salondakılar onun bir saatdan çox çəkən əsaslandırılmış nitqini dinlədilər. O, qəti şəkildə bəyan etdi ki, prokuror tərəfindən tələb olunan cəza həddindən çox sərtdir. D.Madyar keçirilmiş dörd ekspertizadan ikisinin nəticələri ilə qətiyyən razı olmadığını bildirdi və bunu əsaslandırdı. Vəkil cinayətin guya əvvəlcədən planlaşdırıldığı barədə prokurorun ittihamına da qarşı çıxış edərək, özünün təkzibini onunla əsaslandırdı ki, cinayətkar bu cür hərəkətlərə gedərkən cəzadan yayınmaq imkanını qabaqcadan planlaşdırır və hadisə yerindən qaçır. Belə olsaydı, R.Səfərov münasib bir bəhanə ilə Q.Marqaryanı xəlvət yerə aparıb, onu orada öldürə bilərdi. R.Səfərov isə cəzadan yayınmağa çalışmamışdır. D.Madyar bir daha vurğuladı ki, bu, cinayətin sarsıntı vəziyyətində törədildiyini sübut edir.
O, nitqinin sonunda məhkəmədən xahiş etdi ki, hökm çıxarılarkən təqsiri yüngülləşdirən halı nəzərə alsın. O, həmçinin bildirdi ki, prokurorun R.Səfərov barəsində tələb etdiyi həbs müddəti obyektiv deyildir. Ramil Səfərovun şəxsiyyətinin formalaşmasına təsir göstərən Ermənistan-Azərbaycan münaqişəsi amili də hökmün yüngülləşdirilməsi üçün sanballı dəlil ola bilər.
A.Vaşkuti məhkəmə iclasını bağlayaraq elan etdi ki, növbəti iclas aprelin 13-də saat 11.30 dəqiqədə (Bakı vaxtı ilə) olacaqdır. İclasda R.Səfərovun yekun nitqi dinləniləcək, saat 16.30-da isə hakim bu iş üzrə hökm çıxaracaqdır.
