AZƏRTAC-ın xüsusi müxbiri Vaşinqtondan xəbər verir ki, Beynəlxalq Valyuta Fondunun direktor müavini və fəaliyyətdəki sədri Aqustyen Karstens Azərbaycanın makroiqtisadi göstəricilərini, inflyasiyanın aşağı səviyyədə olmasını və manatın sabit məzənnəsini yüksək qiymətləndirib. BVF rəsmisi belə bəyanatla BVF Yoxsulluğun azaldılması və iqtisadi inkişaf proqramı çərçivəsində Azərbaycanın iqtisadi göstəricilərini nəzərdən keçirdikdən sonra çıxış etmişdir. Ölkənin göstəricilərindən razı qalan BVF Azərbaycana proqram çərçivəsində dərhal 19 milyon dollar həcmində 3-cü kredit ayırmağı qərara almışdır. Bununla da Yoxsulluğun azaldılması və iqtisadi inkişaf proqramı üzrə Azərbaycana ayrılan kredit 62 milyon dollara çatmışdır.
Aqustyen Karstens bildirmişdir ki, müsbət makroiqtisadi göstəricilər adambaşı gəliri artırsa da, yoxsulluq hələ də geniş yayılmışdır. Ölkə iqtisadiyyatı neft qiymətlərinin kəskin dəyişməsindən asılı vəziyyətdədir. O, hökümət tərəfindən enerji və bank sistemində tezliklə planlaşdırılmış struktur islahatlarını həyata keçirmək zərurətini vurğulamışdır. BVF rəsmisinin sözlərinə görə, idarəetmədə müsbət dəyişikliklər iqtisadi artım üçün də münbit şərait yaradacaqdır.
