CAREC proqramı çərçivəsində Energetika Nazirliyi ilə gələcək əməkdaşlıq müzakirə olunub
Bakı, 11 sentyabr, AZƏRTAC
CAREC proqramı çərçivəsində Energetika Nazirliyi ilə gələcək əməkdaşlıq müzakirə edilib.
Energetika Nazirliyindən AZƏRTAC-a bildirilib ki, nazirlikdə nazir müavini Samir Vəliyevlə Mərkəzi Asiya Regional İqtisadi Əməkdaşlıq proqramı çərçivəsində CAREC İnstitutunun direktoru Sanjaasuren Bayaraanın rəhbərlik etdiyi nümayəndə heyəti arasında görüş keçirilib.
S.Bayaraa energetikanın əsas prioritet istiqamətlərindən biri olan CAREC proqramı və bu proqram çərçivəsində Azərbaycanla sıx əməkdaşlıqdan bəhs edib. Energetika Nazirliyinin CAREC-in müxtəlif tədbirlərində fəal iştirakı yüksək qiymətləndirilib.
Görüşdə proqrama üzv dövlətlər arasında regionların elektrik enerjisi ilə etibarlı təminatı, energetika sahəsində yüksək texnologiyaların tətbiqi, enerji təhlükəsizliyi və digər məsələlər ətrafında fikir mübadiləsi aparılıb. CAREC proqramı çərçivəsində nazirliklə əməkdaşlığın gələcək istiqamətlərinin müəyyənləşdirilməsinin vacibliyi qeyd olunub.
Azərbaycanda bərpaolunan enerji mənbələrindən istifadə istiqamətində görülən tədbirlər və qarşıya qoyulmuş hədəflər barədə məlumat verən S.Vəliyev bu sahədə beynəlxalq əməkdaşlığın mühüm əhəmiyyət kəsb etdiyini bildirib. CAREC proqramı çərçivəsində gələcəkdə əməkdaşlıq əlaqələrinin bərpaolunan enerji mənbələrinin tətbiqi və enerji səmərəliyi sahəsində inkişaf etdirilməsini təklif edib.
Görüşdə bərpaolunan enerji mənbələri və enerji səmərəliyi sahəsində qarşılıqlı səfərlərin və tədbirlərin keçirilməsi imkanları müzakirə olunub.
Bölmənin digər xəbərləri
