Əcnəbi jurnalistlər Türkiyə seriallarının istehsal prosesi ilə tanış olacaqlar
İstanbul, 27 avqust, AZƏRTAC
Avqustun 28-dən 30-dək İstanbulda “Türkiyə brendinin qlobal təqdimatı: Türk serialları üzrə beynəlxalq media proqramı” keçiriləcək.
AZƏRTAC xəbər verir ki, Türkiyə Prezidenti Administrasiyasının İctimaiyyətlə Əlaqələr Departamenti tərəfindən təşkil olunan proqram çərçivəsində 18 ölkədən 37 media nümayəndəsi mövzu ilə bağlı seminarda iştirak edəcək. Jurnalistlər sektor nümayəndələri ilə görüşərək, müsahibələr və xüsusi məzmunlar hazırlamaq imkanı əldə edəcək, Türkiyə seriallarının istehsal prosesi, çəkiliş meydançaları və texniki infrastrukturu ilə tanış olacaqlar.
Proqram çərçivəsində çəkiliş pavilyonları ilə yanaşı, İstanbul boğazına, Topqapı Sarayına, Ayasofya məscidinə, Balat və Fənər məhəllələrinə səfərlər təşkil ediləcək.
Tədbirin əsas məqsədi serialların Türkiyənin mədəni tanıtımına və qlobal brend dəyərinə verdiyi töhfəni beynəlxalq media vasitəsilə daha geniş auditoriyaya çatdırmaqdır.
Bölmənin digər xəbərləri
