® “Ziraat Bank Azərbaycan”ın ilk istiqraz emissiyası üçün “Açılış Zəngi” çalınıb
Avqustun 26-da Bakı Fond Birjasında “Ziraat Bank Azərbaycan” ASC-nin istiqrazlarının ticarətə buraxılmasına həsr olunmuş “Açılış Zəngi” tədbiri keçirilib.
Tədbirdə “Ziraat Bank Azərbaycan” ASC-nin, Bakı Fond Birjasının, “PAŞA Kapital İnvestisiya Şirkəti” QSC-nin, nümayəndələri, investorlar və digər qonaqlar iştirak ediblər.
“Ziraat Bank Azərbaycan”ın 15 milyon manat həcmində istiqraz emissiyasına bazardan 60,6 milyon manat, yəni, emissiya məbləğinin 4 mislindən çox tələb daxil olub. Tələbin təklifi əhəmiyyətli dərəcədə üstələməsi investorların bankın maliyyə dayanıqlılığına, etibarlılığına və gələcək inkişaf perspektivlərinə olan inamını nümayiş etdirir. Eyni zamanda, 144 investorun istiqrazlara maraq göstərməsi emissiyanın geniş investor auditoriyasını əhatə etdiyini, eləcə də Azərbaycanda alternativ və proqnozlaşdırıla bilən investisiya alətlərinə marağın artdığını göstərir.
Tədbirdə çıxış edən “Ziraat Bank Azərbaycan” ASC-nin İdarə Heyətinin sədri Dr.Selçuk Demir emissiyanın bank üçün yalnız maliyyələşdirmə əməliyyatı deyil, eyni zamanda kapital bazarlarındakı mövqeyini gücləndirən, maliyyə mənbələrini şaxələndirən və yeni investorlarla uzunmüddətli əlaqələr qurmağa imkan yaradan strateji addım olduğunu bildirib.
Dr.Selçuk Demir, həmçinin yaxın zamanda 15 milyon manat həcmində ikinci istiqraz emissiyasının investorlara təqdim edilməsinin planlaşdırıldığını qeyd edib. Bank qarşıdakı dövrdə kapital bazarlarında daha fəal iştirak etməyi və qiymətli kağız emissiyalarını uzunmüddətli maliyyələşdirmə strategiyasının mühüm alətlərindən birinə çevirməyi hədəfləyir.
Tədbirin sonunda “Ziraat Bank Azərbaycan”, Bakı Fond Birjası, “PAŞA Kapital İnvestisiya Şirkəti” nümayəndələrinin iştirakı ilə istiqrazların birjada ticarətə buraxılmasını simvolizə edən açılış zəngi çalınıb. Bununla da istiqrazların Bakı Fond Birjasının ticarət platformasında dövriyyəsinə rəsmi start verilib.
Qeyd edək ki, istiqrazların ümumi həcmi 15 milyon manat, tədavül müddəti 12 ay, illik faiz dərəcəsi isə 10,5 faiz təşkil edir. Kupon ödənişləri hər rüb həyata keçiriləcək. Bir istiqrazın nominal dəyəri və minimum investisiya məbləği 100 manatdır.
“Ziraat Bank Azərbaycan” ASC Türkiyə Respublikasının 162 illik tarixə malik “Ziraat Maliyyə Qrupu”nun üzvüdür. Bank Azərbaycan Respublikasının Mərkəzi Bankı tərəfindən verilmiş 30.12.2014-cü il tarixli 255 nömrəli lisenziya əsasında fəaliyyət göstərir. Korporativ və pərakəndə bankçılıq sahəsində müasir məhsul və xidmətləri Bakı, Gəncə, Sumqayıt və Naxçıvan şəhərlərində yerləşən 11 filialı və Quba şəhərində yerləşən 1 şöbəsi ilə yanaşı, rəqəmsal platformalar üzərindən də müştərilərə xidmət göstərir.
Bankın məhsul və xidmətləri barədə daha ətraflı məlumatı Bankın “Instagram”, “X” platforması, “Linkedin”, “YouTube” sosial media hesablarından və ya *9229 qısa nömrəsinə zəng edərək əldə edə bilərsiniz.
Bölmənin digər xəbərləri
