Cənubi Qafqaz bölgəsinin müasir tarixini yazan lider
Bakı, 18 oktyabr, AZƏRTAC
Elə liderlər var ki, onlar tarixə düşür və orada dərin iz qoyur. Ancaq liderlər də var ki, tarix yazır və yaradır. Azərbaycanın ötən 20 il ərzində böyük inkişaf və tərəqqisinə yol açan, xalqına son 200 ildə ilk dəfə böyük Qələbəni yaşadan İlham Əliyev məhz ölkəmizin, bu məmləkətin yerləşdiyi coğrafi məkanın, bölgənin müasir tarixini yazan liderə çevrildi. Beləliklə də Prezident İlham Əliyev tarixdə güclü dövlət başçısı, fədakar insan və unikal şəxsiyyət, sözünü əməli ilə təsdiqləyən, mümkünsüzləri mümkün edən lider kimi yaşamaq haqqını qazandı.
Bu fikirləri AZƏRTAC-a müsahibəsində Azərbaycan Respublikasının Prezidenti yanında Dövlət İdarəçilik Akademiyasının şöbə müdiri siyasi elmlər doktoru, professor Ziyafət Həbibova söyləyib. Professor Z.Həbibova bildirib ki, Ümummilli Lider Heydər Əliyevin vaxtilə söylədiyi “Azərbaycan dünyaya günəş kimi doğacaq” vədinin gerçəkliyə çevrilməsi məhz Prezident İlham Əliyevin titanik fəaliyyətinin nəticəsidir. Bu gün Azərbaycan bütün dünyada zəngin iqtisadi, siyasi və hərbi potensialı olan bir ölkə kimi tanınır və qəbul edilir. Ölkəmizi Zəfərə aparan son 20 ildə keçdiyimiz inkişaf yolunu, iqtisadi-sosial qüdrətimizin miqyasını təsəvvür etmək üçün bir neçə faktı qeyd etmək kifayətdir. Bu qısa zaman kəsiyində ölkədə ümumi daxili məhsul 4 dəfə, büdcə gəlirləri 30 dəfədən çox, xarici ticarət dövriyyəsi 10 dəfə artıb, xarici borcun həcmi azaldılaraq ümumi daxili məhsulun təxminən 10 faizini təşkil edib, Azərbaycanın xarici valyuta ehtiyatları birbaşa xarici borcumuzu on dəfə üstələyib, son 30 ildə Azərbaycana 300 milyard dollardan artıq vəsait qoyulub. Azərbaycanın beynəlxalq təşkilatlar tərəfindən də təsdiqlənən uğurlarının təməlində, heç şübhəsiz, ölkədə reallaşdırılan çoxşaxəli, səmərəli və innovativ iqtisadiyyatın formalaşmasına əsaslanaraq sosial sahədə önləyici inkişaf trendinin təmin olunması, əhalinin rifahının qabaqcıl beynəlxalq standartlara çatdırılmasına yönələn siyasi kurs, strategiya və uğurlu idarəçilik dayanır. Azərbaycan Respublikasının konseptual inkişaf istiqamətlərinin meyar göstəriciləri 1993-cü ildən başlayaraq formalaşıb, inkişaf edib və təcrübə ilə zənginləşib. Ulu Öndər Heydər Əliyevin rəhbərliyi ilə başlanan islahatlar istiqamətindəki fəaliyyət, hazırda Prezident İlham Əliyevin uğurlu siyasəti ilə yeni mərhələyə qədəm qoyub. Sosial-iqtisadi sahələrdə əldə olunan uğurlar beynəlxalq reytinq agentliklərinin Azərbaycan iqtisadiyyatı ilə bağlı ildən-ilə yaxşılaşan qiymətləndirmələrində də öz əksini tapıb.
“Respublikamız qısa zaman kəsiyində siyasi və iqtisadi cəhətdən güclü, millətlərarası və konfessiyalararası vəhdətin dövlət ideologiyasının əsasını təşkil etdiyi demokratik ölkəyə çevrilib. Ölkədaxili və xarici siyasət sahəsində uğurlar Azərbaycanın inkişaf vektorunun düzgün seçilməsindən xəbər verir. “Öncə iqtisadiyyat, sonra siyasət” klassik deyiminə dayanan strategiya ölkədə reallaşdırılan islahatların uğurlu yekununa yol açıb. Prezident İlham Əliyevin yürütdüyü siyasi kursun prioriteti Azərbaycan Respublikasının dünya dövlətləri arasında rəqabətədavamlı, effektiv və stabil inkişaf sahəsində layiqli yer tutması, kəmiyyət deyil, keyfiyyətə əsaslanan iqtisadi yüksəlişə nail olması və vətəndaşlar üçün yüksək həyat standartlarının təmin edilməsidir. Bu hədəfə çatmaq üçün köklü tədbirlər görülüb və ilk növbədə cəmiyyətin başlıca ideyası - intellektə əsaslanan millətin formalaşdırılması ideyasının gerçəkləşdirilmə mexanizmləri işə salınıb”, - deyə professor Ziyafət Həbibova bildirib.
O vurğulayıb ki, bu gün Xankəndində, Xocalıda, Əsgəranda üçrəngli bayrağımızın dalğalanması, imzalar içində millətin imzasının olması sözünə, vədinə sahiblənməyə qadir, Müzəffər Ali Baş Komandan, Prezident İlham Əliyevin qətiyyəti və idarəçilik qabiliyyətinin bəhrəsidir.
Bölmənin digər xəbərləri
