Çexiya Qələbə Gününü qeyd edir
Praqa, 9 may, AZƏRTAC
Çexiya milli bayramını - Avropada İkinci Dünya müharibəsinin başa çatmasının 80-ci ildönümünü qeyd edir.
AZƏRTAC xəbər verir ki, Praqanın Vitkov təpəsindəki Milli Memorialda dövlət rəhbərləri Naməlum Əsgərin məzarı önünə gül dəstələri qoyub, daha sonra hərbi baxış keçirilib.
Fəxri qarovul dəstəsinin komandiri respublika Prezidenti Pyotr Pavelə raport verib, sonra ölkənin Dövlət Himni səsləndirilib. “Tanrının döyüşçüləri kimdir” qədim xoralın sədaları altında əsgərlər tarixi ordu bayraqlarını çıxarıblar. Naməlum əsgərin məzarı önünə ilk olaraq Çexiya Prezidenti əklil qoyub.
Çexiya Respublikasının Prezidenti Pyotr Pavel, Baş nazir Pyotr Fiala, müdafiə naziri Yana Çernoxova və başqaları toplaşanlar qarşısında çıxış ediblər. Prezident Pavel çıxışında Çexiyanın Rusiyanın hücumuna məruz qalan Ukraynanın hüquqlarını müdafiə edərək düzgün addım atdığını bəyan edib. Onun sözlərinə görə, 1938-ci ildə Çexoslovakiyanın müttəfiqlərindən də eyni hərəkət gözlənilən idi, ölkə nasist Almaniyasının tələbləri ilə üzləşmişdi. O, tarixin təkrarlanmaq meyilinin olduğunu da xatırladıb.
Vüqar Seyidov
AZƏRTAC-ın xüsusi müxbiri
Praqa
Bölmənin digər xəbərləri
