Çexiyada “Tələbələrin demokratiya uğrunda mübarizəsi günü” keçirilmişdir
Praqa, 18 noyabr (AZƏRTAC). 1939-cu il noyabrın 17-də çexiyalı tələbələrlə nasistlər arasında toqquşma olmuşdur. 1939-cu il oktyabrın 28-də, Çexiyanın Müstəqillik Günündə tələbələrin müqavimət hərəkatı başlanmış, nəticədə tələbələr kütləvi şəkildə həbs edilmiş, Çexiya ali məktəbləri bağlanmışdır.
1989-cu il noyabrın 17-də tələbələr nümayiş keçirmiş, bu aksiya polislə tələbələr arasında toqquşma ilə başa çatmışdır. Tələbələrdən birinin ölümü haqqında yayılmış (sonradan təkzib edilmiş) xəbər ölkədə kütləvi nümayişlərə və tətillərə səbəb olmuşdur. Yekunda ölkədəki kommunist rejimi bir neçə gün ərzində süqut etmişdir. Bu hadisələr tarixə “məxməri inqilab” adı ilə düşümüdür.
Bazar günü, noyabrın 17-də Praqada bir sıra xatirə tədbirləri keçirilmişdir. Baş nazir İrji Rusnok bu bayramla əlaqədar nitqində qeyd etmişdir ki, Çexiya tarixində iki dəfə tələbələr yalana və zorakılığa əsaslanan rejimlərə qarşı fəal çıxış etmişlər. Baş nazir demişdir ki, 1939-cu və 1989-cu illərin ideallarını daim yadda saxlamaq lazımdır.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
