Çin Rusiya və Ukraynanı ilkin şərt olmadan danışıqları bərpa etməyə çağırıb
Bakı, 25 fevral, AZƏRTAC
Çin Moskva və Kiyevi ilkin şərt olmadan beynəlxalq ictimaiyyətin köməyi ilə danışıqları bərpa etməyə çağırır.
AZƏRTAC xəbər verir ki, bunu cümə günü Çinin BMT-dəki daimi nümayəndəsinin müavini Day Bin Təhlükəsizlik Şurasının Ukrayna mövzusu üzrə iclasında çıxışı zamanı deyib.
“Diplomatik danışıqlar Ukrayna böhranını həll etməyin yeganə yoludur. Beynəlxalq ictimaiyyət sülh və danışıqları təşviq etməli, danışıqların bərpası üçün əlverişli platformalar yaratmaq və asanlaşdırmaq üçün təcili çalışmalıdır. Münaqişə tərəflərini danışıqlar masası arxasına çəkmək asan iş olmayacaq. Ancaq bu, siyasi həll yolunda ilk addımdır... Biz Rusiya və Ukraynanı ilkin şərt olmadan danışıqları bərpa etməyə çağırırıq. Ukrayna böyük dövlətlər arasında mübarizə meydanı deyil, heç kim bu münaqişədən Ukrayna xalqı hesabına faydalanmağa çalışmamalıdır", - deyə diplomat bildirib.
“Qırmızı xətt heç vaxt keçilməməlidir. Nüvə müharibəsi aparılmamalıdır", - deyən Day Bin qeyd edib ki, münaqişənin genişlənməsi riski ilə əlaqədar böyük dövlətlərin üzərinə xüsusi öhdəliklər düşür: “Kommunikasiya və koordinasiya kanallarını saxlamaq, böhranın qarşısını almaq üçün hər şeyi etmək lazımdır. Beynəlxalq ictimaiyyət atom elektrik stansiyalarına və ya digər dinc nüvə obyektlərinə edilən hücumlara qarşı səsini çıxarmalıdır.”
Qeyd edək ki, Çinin Xarici İşlər Nazirliyi Ukrayna böhranının siyasi həlli ilə bağlı 12 bəndlik bəyanat yayımlayıb. Bəyanatda ölkələrin suverenliyinə və ərazi bütövlüyünə hörmət edilməsi, tərəflər arasında birbaşa dialoqun bərpası, gərginliyin qarşısının alınması kimi prinsiplər yer alır.
Bölmənin digər xəbərləri
