DÜNYA
Çinin daha bir şəhərində koronavirusa görə kütləvi test aparılır
![Çinin daha bir şəhərində koronavirusa görə kütləvi test aparılır](/files/2021/3/1200x630/16369763584489530006_1200x630.jpg)
Pekin, 15 noyabr, AZƏRTAC
Çində COVID-19 pandemiyasının hazırkı dalğası ilə əlaqədar Dalyan şəhərində sakinlərin kütləvi şəkildə koronavirus testindən keçirilməsinə başlanılıb.
AZƏRTAC şəhər hökumətinin məlumatına istinadla xəbər verir ki, son günlər Dalyanda yoluxma hallarının davamlı xarakter alması kütləvi testi şərtləndirən amil olub. Proses üçün avadanlıq və tibbi heyət səfərbər olunub. Hazırda 7,45 milyon nəfər sakini olan şəhərin gündəlik test potensialı 468 mindir.
Qeyd edək ki, Çində oktyabrın 16-dan başlayan pandemiyanın yeni dalğasında Dalyan şəhərinin aid olduğu Liaonin vilayəti də daxil olmaqla, ölkənin 21 bölgəsində yoluxmalar aşkarlanıb. Budəfəki yoluxma coğrafiyasının geniş olması səlahiyyətli qurumları ciddi qərarlar qəbul etməyə vadar edib. Belə ki, yoluxma ocaqları olan bir neçə yaşayış məntəqəsində qapanma elan edilib, iş yerləri və məktəblər bağlanıb, kütləvi tədbirlər ləğv olunub. Yoluxma zəncirini tapmaq üçün epidemioloji təhqiqat çərçivəsində bir neçə mərhələdə kütləvi test prosesi həyata keçirilir. Lokal qapanma və kütləvi test prosesi Çində pandemiya ilə mübarizənin ən vacib məqamlarından hesab olunur.
Şahin Cəfərov
AZƏRTAC-ın xüsusi müxbiri
Pekin