Azərbaycan Gənclər Təşkilatları Milli Şurasından, gənclərin “Piliqrim” ekoturizm qeyri-hökumət təşkilatından, Dağ İdman Klubundan ibarət “Gücümüz birlikdədir” koalisiyası Dəvəçi rayonunda növbəti təbiəti mühafizə aksiyası keçirmişdir. “Piliqrim”-dən
AZƏRTAC-ın müxbirinə bildirmişlər ki, ümummilli liderimiz Heydər Əliyevin xatirəsinə həsr olunmuş bu aksiya Gənclər, İdman və Turizm Nazirliyinin köməyi ilə təşkil edilmişdir. Böyük Qafqaz dağlarının şərq qurtaracağında - qədim şimal müdafiə tikililərinin bir hissəsi olan əfsanəvi Çıraqqalanın xarabalıqları yaxınlığında ekoturist cığırlarının və çadır düşərgələri üçün meşə dayanacaqlarının abadlaşdırılması işləri aparılmışdır.
Aksiya iştirakçıları cari ildə bu diyara qonaq gələcək turistlər və ekskursiyaçılar üçün meşə cığırlarının nişanlanması işlərini görmüşlər. Cığırlar ona görə nişanlanır ki, ekskursiyaçılar və turistlər müyyən marşrutla getsinlər və təbii landşaftı pozmasınlar, heyvanları, quşları nararahat etməsinlər, bitkiləri zədələməsinlər.
Yerli əhali bu təşəbbüsü dəstəkləmiş və gələcəkdə keçiriləcək aksiyalarda iştirak etməyə hazır olduğunu bildirmişdir.
