ÇÖL QUŞLARININ TƏLƏF OLMASI BARƏDƏ YAYILMIŞ MƏLUMAT ƏSASSIZDIR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, Abşeron ərazisində, o cümlədən Bilgəh qəsəbəsinin Xəzəryanı zonasında çöl quşlarının tələf olması barədə bir sıra kütləvi informasiya vasitələrinin Turan informasiya agentliyinə istinadla yaydıqları məlumatın heç bir əsası yoxdur.
Məlumatı yoxlamaq üçün Xidmətin mütəxəssisləri Bilgəh qəsəbəsi üzrə icra nümayəndəliyinin iştirakı ilə həmin ərazidə monitorinq keçirmiş, sakinlərlə söhbət etmişlər. Ərazidə çöl quşlarının tələf olması faktı aşkar edilməmişdir.
Dövlət Baytarlıq Xidməti kütləvi informasiya vasitələrini dəqiqləşdirilməmiş məlumatları yaymaqdan çəkinməyə, əhalini isə şayiələrə inanmamağa çağırır. Eyni zamanda, köçəri quşların miqrasiyası ilə əlaqədar ev quşlarının qapalı şəraidə saxlanılması tövsiyə edilir. Köçəri və çöl quşlarının ovlanılması, satılması və onlardan qida məhsulu kimi istifadə edilməsi qəti qadağandır.
Hazırda respublikada epizootik vəziyyət sabitdir. Bu sabitliyi qoruyub saxlamaq üçün əlaqədar qurumlarla birgə lazımi tədbirlər görülür.
Bölmənin digər xəbərləri
