DAXİLİ İŞLƏR NAZİRLİYİ MƏTBUAT XİDMƏTİNİN MƏLUMATI
Azərbaycan Respublikasının daxili işlər naziri, general-polkovnik Ramil Usubov iyulun 23-də Səudiyyə Ərəbistanı Krallığının ölkəmizdəki fövqəladə və səlahiyyətli səfiri cənab Əli Həsən Cəfəri qəbul etmişdir.
Qonağı səmimi salamlayan nazir daxili işlər orqanlarının fəaliyyəti, müstəqillik dövründə keçilmiş çətin, eyni zamanda şərəfli yol, əldə edilmiş uğurlar barədə ətraflı söhbət açmışdır. Qeyd olunmuşdur ki, bir tərəfdən Ermənistanın ölkəmizə qarşı hərbi təcavüzü, Azərbaycan ərazisinin 20 faizinin işğalı, 1 milyon soydaşımızın öz yurd-yuvasından qaçqın düşməsi, digər tərəfdən dağıdıcı siyasi qüvvələrin hakimiyyəti zor gücünə ələ keçirmək məqsədi daşıyan qeyri-konstitusion hərəkətləri nəticəsində yaranmış hərc-mərclik, ayrı-ayrı partiyalara məxsus qanunsuz silahlı dəstələrin qarşıdurması 1993-cü ildə xalqımızı vətəndaş müharibəsi, müstəqil dövlətimizi parçalamaq və məhv olmaq təhlükəsi ilə üzbəüz qoymuşdur. Respublikanın belə bir ağır durumunda xalqın təkidli tələbi ilə görkəmli dövlət xadimi, müdrik siyasətçi cənab Heydər Əliyev hakimiyyətə qayıtdı. Görülən sonrakı tədbirlər, aparılan uğurlu daxili və xarici siyasət tədricən öz bəhrəsini verməyə başladı.
1995-ci ilin ortalarından etibarən sabitlik bərpa olundu, qanunsuz silahlı dəstələr zərərsizləşdirilməyə, qanunsuz saxlanılan silahlar yığılmağa başlandı, kriminogen durum tam nəzarət altına alındı. Beləliklə, həm ölkə vətəndaşlarının konstitusion hüquqlarının bərpa edilib qorunması, həm də əcnəbilərin, o cümlədən xarici sərmayədarların təhlükəsizliyi etibarlı təmin olundu. Bu iş daim ölkə rəhbərimizin gündəlik nəzarətindədir. Danılmaz bir faktdır ki, indi Azərbaycan MDB ölkələri içərisində ən az cinayət törədilən, ən sabit dövlətlərdən biridir.
General-polkovnik Ramil Usubov keçid dövrü üçün təbii sayılan çətinliklərdən və həlli vacib problemlərdən danışarkən narkotik maddələrlə bağlı cinayətlərin artmasından narahatlığını bildirmiş, bu növ cinayətlərə qarşı da qətiyyətli mübarizənin vacibliyini vurğulamışdır. O, qonağın nəzərinə çatdırmışdır ki, Azərbaycanın Daxili İşlər Nazirliyi cinayətkarlıqla mübarizə sahəsində, hüquqi-demokratik islahatların həyata keçirilməsi prosesində bir sıra dövlətlərlə səmərəli əməkdaşlıq edir. Biz çox istərdik ki, Səudiyyə Ərəbistanının daxili işlər orqanları ilə də qarşılıqlı faydalı əlaqələri inkişaf etdirək.
Səmimi qəbula və dolğun məlumata görə Ramil Usubova minnətdarlığını bildirən cənab Əli Həsən Cəfəri qeyd etmişdir ki, Azərbaycanda sabitliyin, ölkə vətəndaşlarının və əcnəbilərin təhlükəsizliyinin təmin olunması vəziyyətindən, bu istiqamətdə görülən tədbirlərdən məmnundur və ölkəmizdə cənab Heydər Əliyevin rəhbərliyi ilə görülən işlər, qazanılan misilsiz uğurlar onu ürəkdən sevindirir. Bir çox məsələlərdə, o cümlədən cinayətkarlıqla mübarizədə maraqların üst-üstə düşməsi tərəfdaşlığa yaxşı zəmindir və cinayətkarlıqla mübarizə sahəsində əməkdaşlığın gerçəkləşməsi üçün artıq konkret addımlar atılır.
İşgüzar və mehribanlıq şəraitində keçən görüşdə bir sıra digər məsələlərə də toxunulmuşdur.
Bölmənin digər xəbərləri
