Deputat: Prezident İlham Əliyev Ermənistandakı bütün revanşist qüvvələrə bir daha xəbərdarlıq etdi
Bakı, 4 oktyabr, AZƏRTAC
Prezident, Müzəffər Ali Baş Komandan İlham Əliyevin Bərdə və Tərtər rayonlarına səfərləri əlamətdar bir günə təsadüf edirdi. Məhz oktyabrın 3-də Suqovuşan qəsəbəsinin işğaldan azad edilməsinin bir ili tamam oldu. Suqovuşan qəsəbəsinin işğaldan azad edilməsi çox böyük strateji əhəmiyyətə malik idi. Düşmən bu istiqamətdə çoxlu sayda silah-texnika, canlı qüvvə cəmləşdirmişdi. Lakin rəşadətli Azərbaycan Ordusu qısa müddət ərzində Suqovuşanda düşmənə ağır zərbələr endirərək qəsəbəni və onunla eyni gündə Talış kəndini işğaldan azad etdi. Bu qəsəbənin işğaldan azad edilməsi ilə mühüm strateji əhəmiyyətli yollar nəzarətə götürüldü. Düşmənin bu istiqamətdə cəmləşdirdiyi qüvvə hərbi əməliyyatların gedişi müddətində tamamilə təcrid edildi. Suqovuşanın işğaldan azad edilməsi düşmən üçün eyni zamanda, çox böyük psixoloji sarsıntı oldu.
Düşmən işğal müddətində buradakı su anbarından istifadə edərək ekoloji terror törətməklə məşğul idi. Qəsəbə işğaldan azad edildikdən sonra Tərtər və digər rayonlara su verilməyə başlanıldı. Ümumilikdə, bu günə qədər suvarılmayan və ya az suvarılan 30 min hektar torpağa su verilib. Bütün bunlarla yanaşı, Şərqi Zəngəzur və Qarabağ zonalarında mövcud olan su ehtiyatlarının istifadəsi ilə bağlı konkret addımlar atılmaqdadır. Yeni su anbarlarının tikintisi istiqamətində ciddi işlər aparılır.
Bu fikirləri AZƏRTAC-a açıqlamasında Milli Məclisin deputatı, Yeni Azərbaycan Partiyasının İdarə Heyətinin üzvü Cavid Osmanov deyib.
İşğaldan azad edilmiş ərazilərdə enerji infrastrukturun qurulmasının əsas prioritetlərdən biri olduğunu qeyd edən deputat diqqətə çatdırıb ki, Suqovuşan qəsəbəsində “Suqovuşan-1” və “Suqovuşan-2” Kiçik Su Elektrik stansiyalarının yenidən qurulması çox böyük əhəmiyyətə malikdir. Hərbi əməliyyatlar zamanı erməni qəsbkarları bu elektrik stansiyalarına da ciddi ziyan vurmuşdular. Yenidən qurularaq istifadəyə verilən “Suqovuşan-1” və “Suqovuşan-2” Kiçik Su Elektrik stansiyaları işğaldan azad edilən ərazilərin, xüsusilə də Suqovuşan və Talış qəsəbələrinin elektrik enerjisi ilə təminatında mühüm rol oynayacaq.
“Hərbi əməliyyatlar bitər-bitməz yenidənqurma və bərpa işlərinə başlayanda ilk olaraq avtomobil yollarının çəkilməsinə start verildi. Təbii ki, işğaldan azad edilmiş ərazilərdə həyatın bərqərar olması üçün ilk növbədə, yol infrastrukturunun qurulması çox böyük əhəmiyyətə malikdir. Tərtərin Suqovuşan qəsəbəsinə və Talış kəndinə gedən avtomobil yollarının açılışı, Talış-Tapqaraqoyunlu-Qaşaltı-Naftalan avtomobil yolunun təməlinin qoyulması da məhz bu istiqamətdə görülən mühüm işlərdəndir.
Otuz il ərzində erməni vandalizmi sərhəd tanımayıb. Ermənilər Azərbaycan xalqına məxsus tarixi, mədəni, dini abidələri dağıtmaqla və saxtalaşdırmaqla məşğul olublar. İslam dininə məxsus dini abidələr, eyni zamanda təhqir edilmiş, heyvan tövlələri kimi istifadə edilib. Prezident İlham Əliyevin səfəri zamanı Talış kəndində ermənilər tərəfindən dağıdılmış alban-udi və pravoslav kilsələrində olması erməni vandalizminə diqqət çəkilməsi deməkdir. Çox təəssüflər olsun ki, dünya ölkələri, müvafiq beynəlxalq təşkilatlar ermənilərin bu vandalizm aktları haqqında susqunluq nümayiş etdirir, bununla bağlı Ermənistana qarşı heç bir təsir göstərilmir”, - deyə C.Osmanov qeyd edib.
Onun sözlərinə görə, hərbi əməliyyatlar dövründə də müharibə cinayətlərindən qalmayan Ermənistan hərb zonasından kilometrlərlə uzaqda yerləşən şəhər və kəndlərimizi qadağan edilmiş silahlar, ballistik raketlərlə atəşə tutur, dinc sakinlərimizi qətlə yetirir, mövcud infrastruktura ciddi ziyan vururdu. Aktiv hərbi əməliyyatlar dövründə Gəncə, Bərdə, Tərtər, Goranboy və digər rayonlarımız erməni terrorundan ciddi əziyyət çəkdi: “Hərbi əməliyyatlar bitdikdən dərhal sonra bu rayonlarda infrastruktura dəymiş zərərin aradan qaldırılması üçün fəal işlərə başlanılıb, vətəndaşların dağıdılmış yaşayış və qeyri-yaşayış obyektləri dövlətimiz tərəfindən bərpa edilərək onların istifadəsinə verilib. Bütün bu proseslər Prezident İlham Əliyevin şəxsi nəzarətində olmuş, işlər yüksək keyfiyyət və sürətlə həyata keçirilib. Prezident İlham Əliyevin Vətən müharibəsi zamanı Ermənistan silahlı qüvvələrinin “Smerç” raketləri ilə hücumu nəticəsində Tərtər şəhərinin sakini Sahib İsmayılovun dağılmış evinə baxması və onun yerinə inşa edilən yeni evdə yaradılan şəraitlə tanış olması deyilənlərə əyani sübutdur.
“Müzəffər Ali Baş Komandan İlham Əliyevin Suqovuşan qəsəbəsində Azərbaycan bayrağını ucaltdıqdan sonra etdiyi çıxışında diqqət çəkən məqamlardan biri Xocalı qatili, əli azərbaycanlıların qanına batmış, qorxaq, xain Serj Sarkisyan haqqında söylədiyi fikirlərdir. Ermənistanın keçmiş prezidenti cinayətkar Serj Sarkisyana edilən sərt xəbərdarlıq, həm də Ermənistanda bütün revanşist qüvvə və şəxslərə edilən xəbərdarlıqdır”, - deyə C.Osmanov fikirlərini yekunlaşdırıb.
Bölmənin digər xəbərləri
