DEPUTATLAR HƏMMƏRUZƏÇİLƏRƏ LAYİQLİ CAVAB VERMİŞLƏR
Ölkəmizə qarşı həmişə qərəzli mövqedən çıxış etmiş A.Qross yenə özünə sadiq qalaraq, Sovetlər Birliyinin süqutundan sonra Azərbaycan vətəndaşlarının baxışlarında ciddi dəyişiklik baş vermədiyini söyləmiş, 2003-cü ilin oktyabr hadisələrində iğtişaş törədənlərə haqq qazandırmağa çalışmışdır. Estoniyalı həmkarı isə ondan heç də geri qalmayaraq, mətbuata təzyiqlər göstərildiyini və məhkəmə sistemində əsaslı dəyişikliklər aparılmadığını söyləmişdir.
Məruzə ətrafında müzakirələr zamanı müxtəlif qruplar və partiyalar adından çıxış etmiş deputatlardan Malkolm Bryus (Böyük Britaniya), Mövlud Cavuşoğlu (Türkiyə), Anatoli Raxanski (Ukrayna), Leonid Slutski (Rusiya), Qoran Lundblad (İsveç), Yunal Luteri (Bolqarıstan), habelə Səməd Seyidov və Gültəkin Hacıyeva həmməruzəçilərə layiqli cavablar verərək, son dövrdə Azərbaycanda Avropa Şurasının tələblərinə uyğun mühüm və böyük dəyişikliklər baş verdiyini, demokratik bir dövlətdə yaşayan insanların şüurunda köklü dönüş yarandığını, ictimai televiziya ilə bağlı qanunun qəbul edildiyini, ölkədə islahatları uğurla həyata keçirən Prezident İlham Əliyevin qısa bir vaxtda dörd əvf fərmanı imzaladığını, Azərbaycanın Avropa Şurasına üzv olarkən götürdüyü bütün öhdəlikləri tamamilə yerinə yetirdiyini və təşkilatda layiqli yer tutduğunu vurğulamış, aparılan məqsədyönlü islahatlar nəticəsində Azərbaycanın tezliklə Cənubi Qafqaz bölgəsində inkişaf etmiş qüdrətli bir ölkəyə çevriləcəyinə böyük inam bəslədiklərini bildirmişlər.
Çıxışlarda Azərbaycandakı inkişafın bu ölkə ilə Avropa Şurası arasında qarşılıqlı əməkdaşlıqdan və inamdan xəbər verdiyi, dövlətimizin beynəlxalq konvensiyaların əksəriyyətinə qoşulduğu, ölkədə hərtərəfli hüquqi islahatlar aparıldığı, məhkəmə orqanlarının təkmilləşdirildiyi, Prezidentin xüsusi fərmanı ilə qəzetlərin nəşriyyata borclarının ödənilməsi vaxtının üç il uzadılmasının mətbuata qayğının təzahürü olduğu, Prezident İlham Əliyevin qısa bir dövrdə siyasi, iqtisadi və sosial sahələrdə islahatlarla bağlı ciddi addımlar atdığı, demokratik təsisatların fəaliyyətinə hərtərəfli şərait yaradıldığı vurğulanmışdır.
Deputatlar Ermənistan-Azərbaycan, Dağlıq Qarabağ probleminə toxunaraq, indiyədək onun həll edilməməsindən ciddi narahatlıqlarını söyləmiş, Avropa Şurasının üzvü olan bir dövlətin təşkilatın digər üzvünün ərazisinin 20 faizini işğal altında saxlamasının yolverilməz olduğunu, bir milyondan artıq insanın qaçqın və məcburi köçkün vəziyyətinə düşməsinin Azərbaycanı çox ağır problemlə üzləşdirdiyini, çadır şəhərciklərində doğulmuş uşaqların normal qayğılardan məhrum olduğunu, Avropa dövlətlərinin münaqişə məsələsinə tələbkarlıqla yanaşmadığını, beynəlxalq hüquq normalarının ziddinə olaraq Ermənistanın suveren dövlətin ərazi bütövlüyünü pozduğunu və BMT Təhlükəsizlik Şurasının dörd qətnaməsinə əməl etmədiyini xatırlatmışlar. Çıxışlarda Azərbaycanın işğal olunmuş Dağlıq Qarabağ bölgəsində və ona bitişik rayonlarında Ermənistanın və qondarma “Dağlıq Qarabağ Respublikası”nın birgə hərbi təlim keçirməsinin regionda sülh üçün ciddi təhlükə yaratdığı, işğal edilmiş ərazilərdə narkotik bitkilər yetişdirildiyi və onlardan alınan narkotiklərin Avropa ölkələrinə tranzit edildiyi, həmin bölgələrdə terrorçuların hazırlandığı xüsusi vurğulanmışdır.
İclasın sonunda məruzə ilə bağlı qətnamə layihəsinə düzəlişlər verilmişdir. Deputatlarımızın bir çox təklifi qəbul edilmişdir.
X X X
Günün ikinci yarısında iclasda “Qadınların seçkilərdə iştirakı” məsələsi müzakirə edilmişdir. İstər məruzədə, istərsə də çıxışlarda son zamanlar bir çox ölkələrdə seçkili orqanlarda qadınların fəallığının getdikcə yüksəldiyini, onların əksəriyyətinin vəzifələrə təyin edildiyi bildirilmiş, seçkili təşkilatlarda qadınların 40 faiz təşkil etdiyi İsveç başqa ölkələrə nümunə kimi göstərilmişdir. Qadınların seçkilərdə iştirakını gücləndirmək üçün Avropa Şurasının üzvü olan ölkələrdə lazımi səviyyədə iş aparılmadığı qeyd olunmuş, bu sahədə çatışmazlığı aradan qaldırmaq məqsədi ilə xüsusi qətnamə layihəsi hazırlanmışdır.
X X X
Həmin gün Monako Avropa Şurasına qəbul edilmişdir. Bu barədə sənədi Avropa Şurasının baş katibi Terri Devis və Monako şahzadəsi Albert de Monako imzalamışlar. Beləliklə, Monako AŞ-nin 46-cı üzvü olmuşdur.
Bölmənin digər xəbərləri
