Diaspor nümayəndələrinin Şuşaya beşinci səfəri başa çatıb
Bakı, 26 iyul, AZƏRTAC
Diasporla İş üzrə Dövlət Komitəsinin dəstəyi və təşkilatçılığı ilə 27 ölkədən 130 diaspor nümayəndəsinin Şuşaya beşinci səfəri başa çatıb.
Diasporla İş üzrə Dövlət Komitəsindən AZƏRTAC-a bildirilib ki, “Biz dəmir yumruğun gücü ilə Şuşadayıq” layihəsi çərçivəsində həyata keçirilən növbəti səfər Azərbaycan Prezidenti İlham Əliyevin Dünya Azərbaycanlılarının V Qurultayında diaspor üzvlərinə tövsiyələrindən sonrakı dövrə təsadüf edib. Dövlətimizin başçısının tövsiyələrində diasporumuzun işğaldan azad edilmiş doğma Qarabağın dirçəldilməsində və inkişafında fəal iştirakının önəmli olduğu bir daha nəzərə çatdırılıb. Qarabağa səfərlərin həm Azərbaycan həqiqətlərinin dünyada təbliğ olunması kimi nəcib missiyaya xidmət etdiyi, həm də dünya ictimaiyyətinin diqqətinin bölgəyə cəlb olunmasına və xarici sərmayənin yatırılmasına ciddi təsir edəcəyi vurğulanıb.
Əllərində Azərbaycan bayraqlarını dalğalandıran soydaşlarımız öz sevinclərini Qarabağa həsr olunmuş xalq və bəstəkar mahnılarını birgə oxumaqla nümayiş etdiriblər. Səfər çərçivəsində diaspor nümayəndələri Şuşanın baş meydanı “Bazarbaşı”, Cıdır düzü, erməni vandalizminə məruz qalmış “Güllələnmiş heykəllər”in olduğu meydan, Şuşa Bəyannaməsinin imzalandığı məkan, Xurşidbanu Natəvanın evi, “Xan qızı bulağı”, Bülbülün ev-muzeyi, Gəncə Qapısı, Saatlı, Aşağı və Yuxarı Gövhər ağa məscidlərini və digər görməli yerləri ziyarət ediblər və postmüharibə dönəmində qədim şəhərimizdə aparılan yenidənqurma və abadlıq işləri ilə tanış olublar.
Səfərin sonunda ənənəyə uyğun olaraq diaspor nümayəndələri Cıdır düzündə Azərbaycan bayrağını dalğalandırıblar. Onlar bu xoşbəxtliyi xalqımıza bəxş edən Müzəffər Ali Baş Komandana və Azərbaycan Ordusuna təşəkkür ediblər.
Antalya-Azərbaycan Kültür və Həmrəylik Dərnəyinin sədri Ceyran Səttarova Şuşanı ilk dəfə gördüyünü deyib: “Heç vaxt Şuşada olmamışdım. Çox həyəcanlıyıq. Elə hissdir ki, bunu sözlə anlatmaq mümkün deyil. Qürurvericidir, çünki 30 ilə yaxın müddətdən sonra torpaqlarımız öz sahiblərinə qayıtdı. Ömür boyu şəhidlərimizə və qazilərimizə borcluyuq, çünki onlar bizi utancverici vəziyyətdən qurtardılar. Biz diaspor üzvləri olaraq bundan sonra da Azərbaycanın ədalətli mövqeyini dünyaya çatdırmaq, vətənimizi təbliğ etmək naminə əlimizdən gələn hər şeyi edəcəyik”.
İsveçdəki Azərbaycan Qarabağ Cəmiyyətinin təsisçisi Abdulla Əmir Haşimi Cavanşir Şuşa səfərini həyatının zirvəsindəki an kimi dəyərləndirib. “Çünki 207 ildən sonra Azərbaycanda elə sərkərdə tapıldı ki, ölkəmizi misilsiz Qələbəyə çatdırdı. Artıq siyasi, diplomatiya və iqtisadi cəhətdən çox güclü olan, sözü dünya çapında qəbul edilən Azərbaycan dünyanın inkişaf edən ölkələri ilə bir sırada dayanır. Fürsətdən istifadə edib, Müzəffər Ali Baş Komandan, Prezident İlham Əliyevə və bu qələbənin əldə olunmasında əməyi keçən bütün şəxslərə minnətdarlığımı bildirirəm”.
Qeyd edək ki, Diasporla İş üzrə Dövlət Komitəsi 2021-ci ildə dörd dəfə (27 iyul, 17 avqust, 9 oktyabr və 2 dekabr tarixlərində) diaspor nümayəndələrinin Şuşa şəhərinə səfərlərini təşkil edib. “Biz dəmir yumruğun gücü ilə Şuşadayıq” şüarı ilə reallaşan səfərlər Azərbaycan diaspor tarixinin ən mühüm hadisələrindən biridir.
Bölmənin digər xəbərləri
