ELM VƏ TƏHSİL
DİM: Rezidenturaya qəbul imtahanının birinci mərhələsində 230 namizəd müsabiqə şərtini ödəyib
Bakı, 5 avqust, AZƏRTAC
Dövlət İmtahan Mərkəzi (DİM) tərəfindən avqustun 4-də keçirilmiş rezidenturaya qəbul imtahanının birinci mərhələsinin (ikinci cəhd; baza fənləri üzrə biliklərin qiymətləndirilməsi) nəticələri açıqlanıb.
DİM-dən AZƏRTAC-a bildirilib ki, nəticələrə əsasən, 230 namizəd müsabiqə şərtini (40 və daha yüksək bal) ödəyib. Müsabiqə şərtini ödəyənlərdən 130 nəfər 3-cü kursu tam bitirmiş (3, 4 və 5-ci kurs) tələbələrdir. Baza fənləri üzrə biliklərin qiymətləndirilməsi imtahanından “məqbul” alan 3-cü kursu tam bitirmiş tələbələr ixtisas fənləri üzrə biliklərin qiymətləndirilməsi imtahanına yalnız rezidenturaya qəbul olmaq hüququ əldə etdikdən sonra buraxılırlar.
İmtahanda ən yüksək nəticə toplanılması mümkün olan 100 baldan 80 bal olub.