DÖVLƏT İDARƏÇİLİK AKADEMİYASINDA DÖVLƏT QULLUĞU GÜNÜ QEYD EDİLMİŞDİR
AZƏRTAC xəbər verir ki, iyunun 23-də Azərbaycan Respublikasının Prezidenti yanında Dövlət İdarəçilik Akademiyasında “Azərbaycanda dövlət qulluğu: konseptual əsaslar və islahatlar strategiyası” mövzusunda elmi-praktiki konfrans keçirilmişdir. Dövlət qulluqçularının peşə bayramı - Beynəlxalq dövlət qulluğu gününə həsr olunmuş tədbirin Azərbaycan Respublikasının Prezidenti yanında Dövlət Qulluğu məsələləri üzrə Komissiya ilə birgə keçirildiyini diqqətə çatdıran akademiyanın rektoru, əməkdar elm xadimi, professor Seyfəddin Qəndilov dövlət qulluğunun Azərbaycandakı inkişaf proseslərinə ümummilli liderimiz Heydər Əliyevin töhfəsini vurğulamış, respublikamızda dövlət idarəçiliyi istiqamətində həyata keçirilən islahatların nəticəsində əldə olunan uğurlardan söz açaraq, bu məsələləri Prezident İlham Əliyevin daim diqqətdə saxladığını bildirmişdir.
Azərbaycan Respublikası Prezidenti yanında Dövlət Qulluğu məsələləri üzrə Komissiyanın sədri, hüquq elmləri namizədi Bəhram Xəlilov artıq ölkəmizdə bayram kimi qeyd edilən bu günün vacibliyindən danışmış, dövlət qulluğu sahəsində son dövrlərdə əldə olunmuş nailiyyətlərdən söz açmışdır. Bildirmişdir ki, dövlət qulluğu sahəsində aparılan islahatların nəticəsi olaraq 2000-ci il iyulun 21-də “Dövlət qulluğu haqqında” Azərbaycan Respublikasının Qanunu qəbul edilmişdir. Bu qanunun qəbul edilməsi ilə ölkədə dövlət qulluğu sahəsində vahid dövlət siyasətinin formalaşdırılmasının əsası qoyulmuşdur.
“Dövlət qulluğu haqqında” Qanun yeni ictimai münasibətlər sahəsini tənzimlədiyindən sənədin tətbiqi zamanı bir sıra problemlər meydana çıxmışdır. Bu problemlərin əksəriyyəti dövlət qulluğu sahəsinə məsul olan müvafiq icra orqanının mövcud olmamasından irəli gəlirdi. Bunu nəzərə alaraq, Azərbaycan Prezidentinin 2005-ci il 19 yanvar tarixli Fərmanı ilə Azərbaycan Respublikasının Prezidenti yanında Dövlət Qulluğu məsələləri üzrə Komissiya yaradılmışdır. Prezidentin 2005-ci il 3 iyun tarixli Fərmanı ilə komissiyanın Əsasnaməsi təsdiq edilmişdir.
Bəhram Xəlilov demişdir ki, komissiyanın əsas məqsədləri
dövlət qulluğu ilə bağlı qəbul edilmiş normativ-hüquqi aktların tətbiqinin təşkil edilməsi, dövlət qulluğu üçün kadrların müsabiqə əsasında seçilməsi, yerləşdirilməsi, dövlət qulluqçularının ixtisas hazırlığının artırılması, attestasiya və sosial müdafiəsi sahəsində, həmçinin digər məsələlər barədə qanunvericiliklə nəzərdə tutulmuş siyasətin həyata keçirilməsini təmin etməkdən ibarətdir.
Komissiya dövlət qulluğu və digər kadr məsələləri sahəsində vahid siyasəti həyata keçirir, dövlət qulluğunun kadr təminatının proqnozlaşdırılması ilə bağlı təkliflər hazırlayır, Azərbaycan Respublikası Prezidentinin və Azərbaycan Respublikasının Dövlət Qulluğunu İdarəetmə Şurasının tapşırıqlarını yerinə yetirir. Komissiya eyni zamanda, bu istiqamətdə normativ-hüquqi aktların layihəsini hazırlayır, dövlət qulluqçularının peşə hazırlığı, ixtisasının artırılması sahəsində dövlət orqanlarının fəaliyyətini əlaqələndirir.
Konfransda, həmçinin “Azərbaycan Respublikasında dövlət sektorunda işləyənlərin statusu” və “Azərbaycan Respublikasında kadr təminatının proqnozlaşdırılması” mövzularında məruzələr də dinlənilmişdir.
######
Bölmənin digər xəbərləri
