DÖVLƏT NEFT FONDUNUN İCRAÇI DİREKTORU ŞAHMAR MÖVSÜMOVUN ÇIXIŞI
-Möhtərəm cənab Prezident!
Hörmətli müşavirə iştirakçıları!
Azərbaycan iqtisadiyyatı bu gün dünyada analoqu olmayan yüksək sürətlə inkişaf edir. Cənab Prezident, Sizin rəhbərliyiniz altında ölkədə həyata keçirilən iqtisadi islahatlar öz səmərəsini verir, qəbul edilmiş proqramlar, o cümlədən regionların sosial-iqtisadi inkişafı Dövlət Proqramı uğurla icra olunur. İnsanların həyat səviyyəsinin və sosial vəziyyətinin yaxşılaşdırılması, problemlərin həlli, yoxsulluğun azaldılması istiqamətində mühüm işlər görülmüş, bölgələrdə müasir infrastrukturun yaradılması, məşğulluğun artırılması üçün ardıcıl tədbirlər həyata keçirilir.
Qlobal enerji və nəqliyyat-kommunikasiya layihələrinin uğurla reallaşdırılması, enerji təhlükəsizliyi və təminatı istiqamətində beynəlxalq əməkdaşlığın genişləndirilməsi ölkəmizin dünya dövlətləri arasında siyasi çəkisini və nüfuzunu artırmaqdadır.
Banisi ulu öndər Heydər Əliyev olan Milli Neft Strategiyasının uğurla reallaşması sayəsində dövlətimizin valyuta potensialı, o cümlədən Dövlət Neft Fondunun vəsaiti sürətlə artır. Dövlətimizin maliyyə potensialının genişlənməsi ölkəmizin dayanıqlı inkişafını təmin etməyə, xüsusilə də əhalinin maddi rifah halının və sosial şəraitinin yaxşılaşdırılmasına əlverişli imkanlar yaradır.
Hörmətli cənab Prezident!
Ermənistanın Azərbaycana hərbi təcavüzü nəticəsində öz doğma yurdlarından didərgin düşmüş və ağır şəraitdə yaşayan qaçqın və məcburi köçkünlərin problemlərinin həlli daim diqqət mərkəzindədir. Ulu öndərimizin Sərəncamına əsasən Dövlət Neft Fondundan ilk vəsaitin məhz qaçqın və məcburi köçkünlərin sosial-məişət şəraitinin yaxşılaşdırılmasına yönəldilməsi bu məsələnin dövlətimiz üçün nə qədər vacib olduğunu təsdiqləyir.
2001-ci ildən başlayaraq 2007-ci il iyulun 31-dək qaçqın və məcburi köçkünlərin sosial-məişət problemlərinin maliyyələşdirilməsi məqsədi ilə Dövlət Neft Fondundan ümumilikdə 318,7 milyon manat vəsait ödənilmişdir. Cari ilin yanvar-iyul aylarında bu tədbirlərin maliyyələşdirilməsinə Neft Fondundan ümumilikdə 94,2 milyon manat məbləğində vəsait yönəldilmişdir.
Cənab Prezident, Sizin qəbul etdiyiniz fərman və sərəncamlara əsasən Azərbaycanın bir sıra rayonlarında qaçqın və məcburi köçkünlər üçün zəruri infrastrukturu ilə birlikdə yeni qəsəbələrin salınması, onların məskunlaşma problemlərinin həlli və çadır düşərgələrinin tam ləğv edilməsi istiqamətində genişmiqyaslı işlər aparılmışdır.
2001-ci ildən etibarən Dövlət Neft Fondunun vəsaiti hesabına Azərbaycanın müxtəlif bölgələrində, o cümlədən Ağdam, Füzuli, Biləsuvar, Goranboy, Sabirabad, Ağcabədi rayonlarında qaçqın və məcburi köçkünlər üçün qəsəbələr salınmış, eləcə də Şəmkir, Ağstafa, İsmayıllı, Oğuz, Şəki, Gədəbəy rayonlarında, Naxçıvan Muxtar Respublikasında, Bakı, Sumqayıt, Yevlax şəhərlərində, Mehdiabad, Ramana qəsəbələrində məcburi köçkünlər üçün yaşayış binaları, müvafiq sosial-mədəni və digər obyektlər tikilib istifadəyə verilmişdir.
Dövlət Neft Fondunun büdcəsində nəzərdə tutulmuş vəsaitlər hesabına indiyə qədər 12 min 278 qaçqın və məcburi köçkün ailəsi üçün yaşayış binaları tikilib istifadəyə verilmiş, cari ilin sonunadək bu rəqəmin 15 mindən çox olacağı gözlənilir və qalan 3 çadır düşərgəsinin Sizin tapşırığınıza uyğun olaraq ləğv edilməsi nəzərdə tutulur.
Bütün qəsəbələrdə yaşayış binaları ilə yanaşı müvafiq infrastruktur sistemləri və digər sosial-mədəni obyektlər, o cümlədən yardımçı elektrik stansiyaları, yanğınsöndürmə məntəqələri, su nasos stansiyaları, inzibati binalar, məktəblər, xəstəxanalar, rabitə qovşaqları, uşaq bağçaları və digər obyektlər tikilmiş, müvafiq yol infrastrukturu, irriqasiya sistemləri yaradılmışdır.
Möhtərəm Prezident, Sizin rəhbərliyinizlə ölkəmizdə aparılan geniş quruculuq işləri, dövlətimizin sürətli inkişafı xalqımızın maddi-rifah halını daha da yaxşılaşdıracaqdır. Dövlət Neft Fondunun kollektivi bütün səylərini bundan sonra da Sizin rəhbərliyiniz altında böyük quruculuq işlərinin həyata keçirilməsinə səfərbər edəcəkdir.
Diqqətinizə görə təşəkkür edirəm.
Bölmənin digər xəbərləri
