DÖVLƏT QULLUĞU MƏSƏLƏLƏRİ ÜZRƏ KOMİSSİYA BİR İLLİK FƏALİYYƏTİ İLƏ BAĞLI HESABAT VERMİŞDİR
AZƏRTAC xəbər verir ki, dekabrın 28-də Beynəlxalq Mətbuat Mərkəzində Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın (DQMK) sədri Bəhram Xəlilov qurumun başa çatmaqda olan il üzrə fəaliyyətinə həsr edilmiş mətbuat konfransı keçirmişdir.
Sədr bildirmişdir ki, cari ildə DQMK tərəfindən 55 nazirlik və komitədə 770-dən çox vakant vəzifənin tutulması üçün 3 müsabiqə elan edilmiş və keçirilmişdir. İctimaiyyəti tam məlumatlandırmaq, şəffaflığın və bərabərhüquqlu iştirakın təmini məqsədi ilə respublikamızda ilk dəfə olaraq vakant vəzifə barədə məlumatları tam şəkildə özündə əks etdirən elanlar KİV-də dərc edilmiş, komissiyanın saytında yerləşdirilmişdir.
Namizədlərin test imtahanlarına hazırlığını təmin etmək məqsədi ilə test bankı və istifadə edilmiş ədəbiyyat siyahısı komissiyanın internet səhifəsində öz əksini tapmışdır. Test imtahanı zamanı namizədlərin zəruri peşə-ixtisas, qanunvericilik və kompyuter bilikləri, habelə məntiqi düşünmə qabiliyyəti sınaqdan keçirilir.
Müsabiqənin ikinci mərhələsində isə namizədlərlə aparılan söhbət zamanı kollegiallıq, obyektivlik və şəffaflıq təmin edilir.
Keçirilmiş müsabiqələrdə iştirak etmiş 3655 nəfərdən 186-sı müvəffəqiyyət qazanmış, onlardan 58-i müxtəlif dövlət qulluğu vəzifələrinə təyin, digərləri isə ehtiyata götürülmüşlər və müraciət edən dövlət orqanlarına təklif olunurlar. Üçüncü müsabiqədən sonra 103 nəfər təyin edilmək üçün əlaqədar dövlət orqanlarına təqdim edilmişdir. Seçilmiş namizədlər dövlət qulluğunda inzibati vəzifələri 6-9-cu təsnifatlar üzrə tutmuşlar. Müsabiqələrin yüksək səviyyədə keçirilməsi nəticəsində müvafiq sahədə aparılan siyasətə ictimaiyyətin, habelə dövlət orqanlarının etimadı artmışdır.
Qeyd olunmuşdur ki, hazırda dövlət orqanlarında vakant vəzifələrin tutulması üçün növbəti müsabiqənin keçirilməsi ilə bağlı hazırlıq işləri aparılır.
B.Xəlilov bildirmişdir ki, komissiya tərəfindən dövlət orqanlarının müvafiq qurumları üçün kadrların idarə edilməsi üzrə təlimlər və seminarlar təşkil edilmişdir. Hesabat dövründə bu tədbirlərə ümumilikdə 40 dövlət orqanında çalışan 300-ə yaxın dövlət qulluqçusu cəlb edilmişdir. Bu məqsədlə dövlət orqanlarının müvafiq struktur bölmələrinin əməkdaşlarının xarici ölkələrə təlim səfərləri olmuşdur.
Dövlət qulluğunda kadr ehtiyatları işinin qnunvericiliyin tələbləri səviyyəsində daha səmərəli qurulması üçün komissiya tərəfindən dövlət qulluğuna dair hüquqi aktları əhatə edən kitablar nəşr edilmiş və paylanmışdır.
Komissiyanın sədri rəhbərlik etdiyi qurum tərəfindən Dövlət Qulluqçularının Reyestrinin aparılması ilə bağlı tədbirlərin də həyata keçirildiyini qeyd etmişdir. Bildirilmişdir ki, ilk növbədə lazımi proqram təminatı hazırlanmış və 32 dövlət orqanında quraşdırılmışdır. Hazırda reyestrin bazasında 3154 dövlət qulluqçusu barədə məlumat toplandığı diqqətə çatdırılmışdır.
Mətbuat konfransında DQMK-nın yeni yaradılmış veb-saytı haqqında da məlumat verilmişdir. Bildirilmişdir ki, komissiyanın ilk saytı 2006-cı ildə istifadəyə verilmiş, ötən bir il ərzində qurumun fəaliyyəti mütəmadi olaraq burada öz əksini tapmışdır. Köhnə saytda bir sıra çatışmazlıqların olmasına baxmayaraq, vətəndaşlarla komissiya arasında əsas informasiya mübadiləsi vasitəsi kimi özünə geniş istifadəçi axını cəlb edə bilmişdi. Saytdan gündəlik istifadəçi sayının 200 nəfərdən artıq olduğunu bildirən sədr qeyd etmişdir ki, bu, yeni fəaliyyətə başlamış komissiya ilə vətəndaşlar arasında qısa müddətdə yaranmış sağlam münasibətlərin bariz nümunəsi kimi qiymətləndirilməlidir.
B.Xəlilov demişdir ki, ötən dövr ərzində istifadəçilərin tələbləri yaxından öyrənilərək saytın həmin tələblərə uyğunlaşdırılması istiqamətində işlər aparılmışdır. Bunun nəticəsi olaraq, bu gün təqdim olunan yeni sayt bir sıra əlavə imkanları özündə birləşdirir. Burada “İnformasiya əldə etmək haqqında” Qanunun tələbləri əsasında sistemləşdirilmiş məlumatlar, ictimai fikrin öyrənilməsi və komissiyanın fəaliyyəti ətrafında şəffaflığın təmin edilməsi məqsədi ilə yaradılmış forum, təkmilləşdirilmiş axtarış sistemi, ünvanlı onlayn müraciəti, rəy sorğusu sistemi, daha çox verilən suallar, məlumatların sistemləşdirilməsindəki keyfiyyət dəyişikliyi, təkmilləşdirilmiş elan sistemi, saytın xəritəsi, çevik idarəetmə sistemi, məlumatların arxivi, alternativ “dqmk.az” veb-saytı öz əksini tapmışdır.
Sonra jurnalistləri maraqlandıran suallar ətraflı cavablandırılmışdır.
Bölmənin digər xəbərləri
