Dövlət Vergi Xidməti ali təhsil müəssisələrində təqdimat və təlimlər keçirib
Bakı, 14 aprel, AZƏRTAC
İqtisadiyyat Nazirliyi yanında Dövlət Vergi Xidməti (DVX) tələbələr üçün təşkil olunan sayca ikinci “Yay təcrübə proqramı” çərçivəsində aprelin 12-14-də Azərbaycan Dövlət İqtisad Universiteti və Bakı Dövlət Universitetində 500-dən çox tələbəyə proqramın təqdimatını keçirib və vergi mövzusunda təlimlər təşkil edib.
Dövlət Vergi Xidmətindən AZƏRTAC-a bildirilib ki, təqdimatlarda DVX-nin İnsan resursları baş idarəsinin əməkdaşları tərəfindən tələbələrə keçiriləcək təcrübə proqramı haqqında ətraflı məlumat verilib, proqramda iştirak üçün qeydiyyat prosesi və seçim mərhələləri barədə zəruri qeydlər çatdırılıb. Təqdimatdan sonra DVX-nin Tədris Mərkəzi tərəfindən tələbələr üçün “Vergi öhdəlikləri və onların yerinə yetirilməsi” və “Vergi məsuliyyəti nədir?” mövzuları üzrə təlimlər keçirilib.
Xatırladaq ki, “Yay təcrübə proqramı”na qeydiyyat aprelin 30-dək davam edəcək.
Bölmənin digər xəbərləri
