DÖVLƏTQAÇQINKOMUN SƏDRİ İRAN İSLAM RESPUBLİKASINA SƏFƏRƏ GEDƏCƏKDİR
Dövlətqaçqınkomun beynəlxalq əlaqələr, informasiya və mətbuat xidməti departamentindən AZƏRTAC-a demişlər ki, baş nazirin müavini - Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənovun başçılığı ilə Azərbaycan nümayəndə heyəti İİR-in İmam Xomeyni adına “İmdad” Komitəsi beynəlxalq humanitar təşkilatının sədri Seyyid Rza Nəyyirinin dəvəti ilə dekabrın 23-dən 28-dək bu ölkədə işgüzar səfərdə olacaqdır.
Səfər zamanı baş nazirin müavini humanitar fəaliyyət sahəsində əlaqələrlə bağlı görüşlər keçirəcək, Dövlətqaçqınkomla “İmdad” Komitəsi arasında qarşılıqlı əməkdaşlıq barədə müzakirələr və təcrübə mübadiləsi aparılacaqdır.
Görüşlərdə respublikamızın qaçqın və məcburi köçkünlərinə, o cümlədən aztəminatlı ailələrə hansı əsas sahələrdə yardımlar göstərilməsi və yardımların artırılması barədə məsələlər də müzakirələrin mövzusu olacaqdır.
Bölmənin digər xəbərləri
