Dünya Bankının nümayəndələri Vəkillər Kollegiyasında olublar
Bakı, 28 yanvar, AZƏRTAC
Dünya Bankının ölkəmizdə həyata keçirilən “Mütərəqqi ədliyyə xidmətləri və müasir məhkəmə infrastrukturu layihəsi” üzrə missiyasının üzvləri Vəkillər Kollegiyasında olublar.
Vəkillər Kollegiyasından AZƏRTAC-a bildiriblər ki, xanım Eva Melisin rəhbərlik etdiyi missiyanın əsas məqsədi layihənin icrası istiqamətində irəliləyişlərin nəzərdən keçirilməsi və əlavə maliyyələşdirmənin hazırlanması işlərinə başlanılmasından ibarətdir.
Azərbaycan Respublikası Vəkillər Kollegiyasının sədr müavini Pərviz Ələkbərov “Mütərəqqi ədliyyə xidmətləri və müasir məhkəmə infrastrukturu layihəsi”nin ölkəmizdə vəkilliyin inkişafına dəstək verilməsində rolunu vurğulayıb. O, layihə çərçivəsində gələcəkdə vəkillərin “Elektron məhkəmə” sistemi üzrə davamlı tədrisinin, habelə vəkillərin işlərinin idarə olunması üzrə “Elektron vəkil” proqram təminatının yaradılmasının zəruriliyini bildirib.
P.Ələkbərov son illər ölkəmizdə vəkillərin sayının artırılması, vəkillərin regionlarda fəaliyyətə təşviq edilməsi, vəkil qurumlarının müasir standartlara uyğun təşkili sahəsində görülmüş işlər barədə məlumat verib.
Bölmənin digər xəbərləri
