EAPV prezidenti: Dünya əhalisinin artması mənzil problemini daha da aktuallaşdırır
Bakı, 20 may, AZƏRTAC
Hazırda iştirak etdiyim sessiya mənzil təminatı məsələsinə həsr olunub. Bu müzakirələr yalnız yeni ideyaların təqdimatı deyil, həm də BMT səviyyəsində müəyyən edilmiş qlobal inkişaf məqsədlərinin həyata keçirilməsini xidmət edir.
AZƏRTAC xəbər verir ki, bu fikirləri Avrasiya Patent Təşkilatının Avrasiya patent şöbəsinin (EAPV) prezidenti Qriqoriy İvliyev Ümumdünya Şəhərsalma Forumunun 13-cü Sessiyası (WUF13) çərçivəsində keçirilən tədbirlər zamanı AZƏRTAC-a açıqlamasında deyib.
Qriqoriy İvliyevin sözlərinə görə, dünya əhalisinin artması mənzil problemini daha da aktuallaşdırır.
“Əgər biz tikinti sahəsində ən yeni texnologiyalardan, innovativ modelləşdirmə və planlaşdırma üsullarından istifadə etməsək, bu problemi köhnə metodlarla həll etmək mümkün olmayacaq. Müasir texnologiyalar uzunömürlü və dayanıqlı tikinti materiallarının hazırlanmasına imkan yaradır. Bu gün elə patentlər mövcuddur ki, istifadə olunan beton materialları zaman keçdikcə daha da möhkəmlənir və yüz illərlə dayanıqlılığını qoruyur. Şəhərsalmada ekoloji yanaşmaların tətbiqi də xüsusi əhəmiyyət daşıyır. Şəhərlərin inkişafı düşünülməmiş tikinti üzərində qurulmamalıdır. Bütün ekoloji tələblərə riayət olunmalı və qabaqcıl ekoloji həllər tətbiq edilməlidir”, - deyə EAPV prezidenti bildirib.
O, nümunə olaraq istifadə müddəti başa çatmış avtomobil təkərlərinin tikinti sektorunda təkrar istifadəsini göstərərək deyib: “İstifadə olunmuş avtomobil şinləri yeni tip binalar üçün möhkəm təməl konstruksiyalarının yaradılmasında tətbiq oluna bilər. Bu kimi innovativ həllər kifayət qədər çoxdur və onların tətbiqi böyük əhəmiyyət daşıyır”.
Bölmənin digər xəbərləri
