“ECONOMİST” JURNALINDA AZƏRBAYCAN XİN-İN MƏTBUAT KATİBİNİN CAVAB MƏQALƏSİ DƏRC OLUNMUŞDUR
AZƏRTAC xəbər verir ki, nüfuzlu “Economist” jurnalının 24 may tarixli nömrəsində Azərbaycan Xarici İşlər Nazirliyi mətbuat xidmətinin rəhbəri Xəzər İbrahimin məqaləsi dərc olunmuşdur.
Britaniya jurnalında yer almış məqalə Ermənistan-Türkiyə sərhədində bu ölkələrin arasında dostluq rəmzi kimi “Qafqaz pendiri” adlı lövhənin açılması haqqında elə həmin nəşrdə dərc olunmuş məqaləyə cavabdır.
Xəzər İbrahim yazır: “Mən bu pendirin dadına baxdım, mənə dadsız gəldi. Bəzi inqridiyentlər yox idi, bəziləri isə əksinə, həddən artıq idi.
Qafqaz haqqında az məlumatı olan, lakin Britaniya jurnalında dərc edilmiş məqalə ilə tanış olmuş oxucu Azərbaycanın Ermənistan-Türkiyə münasibətlərinə mane olduğu qənaətinə gələ bilər. Azərbaycan ermənilərə qarşı nifrəti necə qızışdıra bilər ki, minlərlə erməni qarışıq Azərbaycan ailələrində dinc və əmin-amanlıq şəraitində yaşayır”.
Ermənistan barədə eyni sözləri deməyin mümkün olmadığını qeyd edən Xəzər İbrahim yazır: “Monoetnik Ermənistanda neçə azərbaycanlının yaşadığını kim saya bilər?”.
Mətbuat katibi belə bir faktı da vurğulayır ki, Ermənistan etnik təmizləmə apararaq, Azərbaycan ərazilərinin 20 faizini işğal etmişdir.
Sonda “pendir reseptinə” qayıdan X.İbrahim yazır ki, “erməni işğalına son qoyulması, bir milyondan çox qaçqının və məcburi köçkünün doğma yurd-yuvalarına qaytarılması çatışmayan əsas inqridiyentdir. Yalnız o vaxt qonşular bir araya gəlib ləzzətli pendir hazırlayacaqlar”.
Bölmənin digər xəbərləri
