Əfqanıstanda tiryək istehsalı 8 faiz çoxalıb
Bakı, 17 noyabr, AZƏRTAC
Bu il Əfqanıstanda tiryək istehsalının həcmi 8 faiz artaraq 6,8 min tona çatıb.
AZƏRTAC xəbər verir ki, bu barədə BMT-nin Narkotik Vasitələr və Cinayətkarlıqla Mübarizə İdarəsi məlumat yayıb. “Bu artım dünya bazarlarına 320 ton xalis heroinin çıxması deməkdir”, - BMT-nin məruzəsində belə deyilir.
Hazırda Əfqanıstan dünyadakı bütün tiryək istehlakçıların 80 faizini bu narkotik vasitə ilə təmin edir.
“Əfqanıstanda yaranmış mövcud vəziyyət beynəlxalq ictimaiyyətin təcili müdaxiləsini tələb edir. BMT-nin əfqan xalqına dəstəyi çərçivəsində narkotik vasitələrin qanunsuz becərilməsi və istehsalının, eləcə də dünyada bu məhsullara tələbatın davamlı şəkildə azalmasına nail olmaq lazımdır”, - deyə BMT-nin narkotik vasitələr və cinayətkarlıqla mübarizə idarəsinin rəhbəri Qada Vali bildirib.
İdarənin məlumatına görə, 2021-ci ildə tiryək istehsalından 1,8 milyard dollardan 2,7 milyard dollara qədər gəlir əldə edilib. Əfqanıstandakı qeyri-sabit siyasi vəziyyət tiryək qiymətlərinin təxminən iki dəfə bahalaşmasına səbəb olub ki, bu da istehsalın artması ilə nəticələnə bilər.
Bölmənin digər xəbərləri
