Əhdinə sadiq qalan, arzuları çin olan qəhrəman
Naxçıvan, 18 oktyabr, AZƏRTAC
44 günlük Vətən müharibəsində zəfər salnaməsi yazan oğullardan biri də Şərur rayonunun Çomaxtur kəndində dünyaya göz açan Zülal Mədətlidir.
AZƏRTAC-ın bölgə müxbiri xəbər verir ki, Zülal hələ məktəb illərindən öz həmyaşıdları arasında vətənpərvərliyi, igidliyi və qorxmazlığı ilə seçilib.
Vətən müharibəsi başlayanda artıq bir il olardı Əlahiddə Ümumqoşun Ordunun xüsusi təyinatlı bölməsində müddətdən artıq həqiqi hərbi xidmət qulluqçusu kimi xidmət göstərirdi. 2020-ci il sentyabrın 27-də torpaqlarımızın azadlığı naminə əks-hücum əməliyyatının həyata keçirilməsi yüzlərlə igidimiz kimi, Zülalın da ürəyindən xəbər verirdi. Təsadüfi deyildir ki, Naxçıvandan Qarabağa ilk yollanan xüsusi təyinatlı dəstənin içərisində o da var idi.
Oktyabrın əvvəlindən döyüşlərə qatılan Zülal Şuşa və Xocavənd istiqamətlərində bir sıra strateji ərazilərin düşmən tapdağından təmizlənməsində qəhrəmanlıq göstərib. Həmin ayın 19-u isə son döyüşünə çıxıb. Xocavənd rayonunun Tuğ kəndindəki yüksəkliyi düşməndən azad etdikdən sonra düşmən minaatanından açılan atəş nəticəsində qəhrəmancasına şəhid olub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident, Müzəffər Ali Baş Komandan İlham Əliyevin müvafiq sərəncamları ilə Zülal Mədətli ölümündən sonra 3-cü dərəcəli “Vətənə xidmətə görə“ ordeni, "Vətən uğrunda", “Hərbi xidmətlərə görə”, "Şuşanın azad olunmasına görə" və "Xocavəndin azad olunmasına görə" medalları ilə təltif edilib.
Zülal müharibəyə gedərkən ardınca onu tanıyanlar üçün böyük xətir-hörmət, valideynlərinə sonsuz qürur, Vətənə isə 2 övlad əmanəti buraxıb.
Anası Şərəbanı Mədətova deyir ki, Zülal balaca vaxtından təbiətə bağlı olub, ağacları çox sevirdi: “Həyətə o qədər ağac əkib ki. Gördüyünüz bütün ağaclar, güllər onun nişanəsidir. Biz də qoruyub saxlayırıq. Kənddə yaxşı xətir-hörmət qazanmışdı. Hər kəsə əl tutur, köməklik göstərirdi. Zülal həm də çox vətənpərvər idi. Balaca vaxtından bayrağımızla nəfəs alırdı. O, yeniyetmə olanda biz bir müddət xaricdə yaşadıq. Orada da bayrağı yanından ayırmazdı. Bir dəfə Naxçıvandan Bakıya gedirdik. Arazın qırağından keçəndə işğal olunmuş əraziləri Zülala göstərdim. Dedim ki, bax, düşmənlərimiz bizim o torpaqlarımızı işğal ediblər. Orada mal-heyvanlarını otarırlar. Dedi ki, ana, qoy mən böyüyüm gedib onların dərsini verəcəyəm, mal-heyvanlarını da kəsəcəyəm. Necə demişdisə elə də etdi. Getdi müharibəyə, qəhrəmancasına döyüşdü. Onlarla ermənini qanına qəltan etdiyini deyir yoldaşları. Onların heyvanlarını kəsərək ətini əsgərlərə yedirdib. Bu hadisələri videoya çəkib mənə göndərmişdi. Bax, qisas hissini içində belə böyütmüşdü Zülalım”.
Şərəbanı xanım oğlu haqqında danışarkən göz yaşlarını saxlaya bilmir: “Zülal iki körpə balasını, həyat yoldaşını bizə əmanət edib canını Vətəninə qurban verdi. Valideynlərinə bağlı idi. Həmişə deyirdi ki, ay ana, ay ata, Allah mənim ölümümü sizdən öncə etsin. Sizə bir şey olsa, mən sizsiz yaşaya bilmərəm. Deyirdim ki, ay Zülal, Allah eləməsin, elə demə. Heç olmasa, mən anana yazığın gəlsin. Zülalın dediyi kimi də oldu. O, canını çox sevdiyi Vətəninə, torpağına, bayrağına qurban verdi. Çox sevdiyi bayrağına əbədi olaraq sarıldı oğlum”.
Atası Rəhim Mədətov isə bildirir ki, şəhid Aqil İsmayılovun nəşi gətiriləndə Zülal kənddə idi.
“Hələ müharibəyə getməmişdi. Aqilin atasına demişdi ki, Əli əmi, mən gedib oğlunun qisasını alacağam. Onun qanını yerdə qoymaram. Dediyi kimi də etdi Zülal. Onun döyüşdə necə qəhrəmanlıq göstərdiyini, Aqilin qisasını necə aldığını yoldaşları danışıb. Bir ata kimi bu gün fəxrlə deyirəm ki, Zülal mərd, qorxmaz olub, Vətən müharibəsində igidlik göstərib, qəhrəmancasına vuruşub. Şəhidlərimizin qisasını alıb. Oğlum təkcə 2020-ci ildəki şəhidlərimizin yox, 1990-ci ildən bu günə qədər olan bütün şəhid balalarımızın qisasını alıb”, - deyə Rəhim kişi qürurla fikirlərini tamamlayır.
Bəli, bu gün Zülal kimi qəhrəman oğulların sayəsində atalar, analar başı dik, alnı açıqdırlar. Bayrağımızın Şuşada, Xankəndidə dalğalanması, ərazi bütövlüyümüz və suverenliyimizin tam təmin olunması şəhidlərimizin bu ölkəyə, bu xalqa ən böyük əmanətləridir. İllər, əsrlər keçsə də xalqımız heç vaxt onları unutmayacaq, igid oğulların qəhrəmanlıqlarını daim xatırlayacaq, əmanətlərini göz bəbəyi kimi qoruyacaq!
Bölmənin digər xəbərləri
