Ekologiya və Təbii Sərvətlər Nazirliyinin 4-cü ərazi şöbəsindən AZƏRTAC-ın müxbirinə bildirmişlər ki, iyul ayında Sumqayıt və Abşeron rayonları ərazisində keçirilmiş reydlər nəticəsində ekologiya qanunvericiliyinin pozulması faktları aşkar olunmuşdur. Şöbənin əməkdaşları “Rəndə-1” firmasının ərazisində ağacların qırılması faktlarını aşkara çıxarmışlar. Məlum olmuşdur ki, şəhərin 26-cı məhəlləsində yerləşən alkoqolsuz içkilər istehsalı sexinin məhsulları müvafiq ekoloji ekspertizasız buraxılır, Abşeron rayonu və Sumqayıt ərazisində fəaliyyət göstərən avtoservislərdə tullantılarla bağlı normalara riayət olunmur.

Həmin faktlara əsasən, 5 fiziki şəxs 1375 manat məbləğində cərimələnmiş, inzibati cəza ilə yanaşı, onlara aşkara çıxarılmış pozuntuları aradan qaldırmaq üçün icrası məcburi olan göstəriş verilmişdir.

İyulda 9 nömrəli Sumqayıt orta məktəbi üçün tədris korpusunun tikildiyi sahədə və Heydər Əliyev prospektində ağacların qırılması faktları aşkara çıxarılmışdır. Xəzər sahilində yerləşən “Diana” əyləncə-istirahət mərkəzində heyvanların təhlükəsiz saxlanılması normalarının pozulması barədə bir sıra aktlar tərtib olunmuşdur.

İqtisadi İnkişaf Nazirliyinin əməkdaşları ilə birgə aparılmış monitorinq zamanı iqtisadi qanunvericiliyin pozulması faktları üzrə 6 məsul şəxs 30 525 manat məbləğində cərimələnmişdir. Qanun pozucuları sırasında Sumqayıtdakı “Alovmetal-1” MM və “Qranit-B” firmasının, Abşeron rayonundakı “Qranit-V” firması, “Sarıcan Co” LTD, “Mahmud” KFT, “Elmin-M” MMC, “Mineral” MMC, “Azeno Co” MMC “Binəqədidəmirbeton” ATSC, “İNC Kompaniya”nın adlarına rast gəlinir.

Həmin müəssisələrin rəhbərlərinin üzərinə icrası məcburi olan göstərişlər verilmişdir. “Qurd dərəsi” bağ massivi ərazisində keçirilmiş monitorinq nəticəsində torpağın təkindən istifadə qaydalarının pozulması faktları aşkar olunmuşdur. Qumun qanunsuz daşındığını təsdiq edən materiallar Sumqayıt Prokurorluğuna təqdim edilmişdir.

Atmosferin çirklənməsində təqsirli olan ayrı-ayrı şəxslərə və müəssisələrə qarşı Nazirlər Kabinetinin qərarına uyğun olaraq, cərimə sanksiyaları tətbiq olunmuş, iki fakt üzrə materiallar müvafiq tədbirlər görülmək üçün hüquq mühafizə orqanlarına təqdim edilmişdir.

Nazirliyin 4-cü ərazi şöbəsinin apardığı monitorinqin nəticələrinə əsasən, ötən ay Ətraf Mühiti Mühafizə üzrə Dövlət Fonduna 47418 manat vəsait köçürülmüşdür.