Əlcəzair qəzeti Ermənistan silahlı qüvvələrinin Azərbaycanla sərhəddə təxribatından yazıb
Qahirə, 13 sentyabr, AZƏRTAC
Əlcəzairin “Əl Havar” qəzetində Ermənistan silahlı qüvvələrinin Azərbaycanla sərhəddə törətdikləri təxribat barədə məqalə dərc edilib.
AZƏRTAC-a istinadla hazırlanmış məqalədə qeyd olunub ki, Ermənistan silahlı qüvvələri Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində genişmiqyaslı təxribat törədib, diversiya qrupları sentyabrın 12-də gecə saatlarından başlayaraq müxtəlif istiqamətlərdə Azərbaycan Ordusunun bölmələrinin mövqeləri arasındakı ərazilərin və təminat yollarının minalanmasını həyata keçirib.
Əlcəzair ictimaiyyətinin diqqətinə çatdırılıb ki, Azərbaycanın Müdafiə Nazirliyinin brifinqində Ermənistan silahlı qüvvələrinin Azərbaycan Ordusunun Daşkəsən, Kəlbəcər və Laçın rayonları ərazisindəki mövqeləri müxtəlif çaplı silahlar, o cümlədən minaatanlardan intensiv atəşə tutduğu, nəticədə şəxsi heyət arasında itkilər olduğu, hərbi infrastruktura ziyan dəydiyi bildirilib.
Məqalədə qeyd olunub ki, Ermənistan silahlı qüvvələrinin təxribatının və Azərbaycanın ərazisinə və suverenliyinə qarşı hərbi təhlükələrin qarşısının alınması, hərbi qulluqçuların, Kəlbəcər və Laçın rayonları ərazisində infrastruktur işlərinə cəlb olunmuş mülki işçilərin təhlükəsizliyinin təmin edilməsi məqsədilə döyüş toqquşmasının miqyasının genişlənməsinin qarşısı alınıb və Ermənistan silahlı qüvvələrinin atəş nöqtələrinin susdurulması istiqamətində Azərbaycan Ordusunun bu istiqamətdə dislokasiya olunan bölmələri tərəfindən qəti cavab tədbirləri görülüb.
Sonda vurğulanıb ki, Ermənistan tərəfindən guya Azərbaycan Ordusunun mülki əhalini, obyektləri və infrastrukturu hədəfə alması barədə yayılan məlumatlar həqiqəti əks etdirmir və Ermənistan tərəfinin yaydığı növbəti dezinformasiyadır.
AZƏRTAC-ın xüsusi müxbiri
Qahirə
Bölmənin digər xəbərləri
