“Əli və Nino” əsəri tat dilində çap olunub
Bakı, 20 iyun, AZƏRTAC
Görkəmli Azərbaycan yazıçısı Qurban Səidin Avropanın və ABŞ-ın tanınmış ədəbi tənqidçiləri tərəfindən XX əsrin ən yaxşı romanlarından biri kimi qiymətləndirilən “Əli və Nino” əsəri Multikulturalizm Mərkəzi tərəfindən tat dilinə tərcümə edilərək çap olunub.
Bakı Beynəlxalq Multikulturalizm Mərkəzinin mətbuat xidmətindən AZƏRTAC-a bildiriblər ki, “Əli və Nino” kitabının ideya müəllifi Mərkəzin Himayəçilik Şurasının sədri, akademik Kamal Abdulla, redaksiya heyətinə isə Mərkəzin icraçı direktoru Rəvan Həsənov, Azərbaycan Milli Elmlər Akademiyasının Folklor İnstitutunun direktoru, akademik Muxtar İmanov, filologiya elmləri doktorları, professorlar Şirindil Alışanlı, Tehran Alışanoğlu və tarix elmləri doktoru, professor Solmaz Rüstəmova-Tohidi daxildir.
Layihəyə məsul şəxs Mərkəzin şöbə müdiri Rəşad İlyasovdur. Rafiq Səməndərin rəyçi olduğu kitabı tat dilinə Rusiya Vladimir Dövlət Universitetinin dosenti Telman Əliyev tərcümə edib.
Qeyd edək ki, “Əli və Nino” kitabı ədəbiyyatımızın ən məşhur və qalmaqallı əsərlərindən biridir. Kitab dünyanın 33 dilinə tərcümə olunaraq 66 ölkədə nəşr edilib.
Multikulturalizm Mərkəzi tərəfindən “Əli və Nino” əsəri ötən illər udi, talış və ləzgi dillərinə də tərcümə edilərək çap olunub.
Bölmənin digər xəbərləri
