Əlilliyi olan şəxslərin ifalarından ibarət “Qəlbin nəğməsi” musiqi albomu nəşr edilib
Bakı, 12 iyun, AZƏRTAC
Əmək və Əhalinin Sosial Müdafiəsi Nazirliyi istedad və bacarıqları ilə seçilən əlilliyi olan şəxslərin və onların yaradıcılıq nümunələrinin cəmiyyətə tanıdılması istiqamətində növbəti layihəni gerçəkləşdirib. Nazirlik tərəfindən ölkədə ilk dəfə olaraq əlilliyi olan şəxslərin ifalarından ibarət toplu - “Qəlbin nəğməsi” adlı musiqili albom hazırlanıb.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, albomda əlilliyi olan istedadlı şəxslərin ifalarında klassik, milli və müasir musiqi əsərləri təqdim edilir. Layihənin daha bir özəlliyi alboma əlilliyi olan şəxslərin tanınmış müğənnilərlə birgə ifa etdiyi musiqi əsərlərinin daxil olmasıdır.
“Avroviziya” mahnı müsabiqəsində ölkəmizi təmsil edəcək Samirə Əfəndi ilə birgə əlilliyi olan şəxslərin ifasında Azərbaycanın dövlət himni ilə başlayan alboma sağlamlıq imkanları məhdud gənclərin ifa etdiyi, ümummilli lider Heydər Əliyevə həsr olunmuş “Sən elə bir zirvəsən” mahnısı da daxil edilib.
Həmçinin topluda Aysel Əlizadənin, Turanə Həmidovanın (Əməkdar artist Aygün Bəylərlə birgə), Gülnar Rəhimovanın, Elgiz Babazadənin, Sima Tapdıqovanın, Mehman Çingizoğlunun, Bəhlul Tufanın (Şəmistan Əlizamanlı ilə birgə), Fərqan Arifoğlunun, Seymur Əliyevin, Sadiq Həsənovun, Gülnar Novruzovanın (İlqar Xəyalla birgə), Murad Sadıxın və Fatimə Əkbərlinin səsləndirdiyi mahnılar disk və fləşkartda təqdim olunur.
“Qəlbin nəğməsi” albomu Əqli Mülkiyyət Agentliyində qeydiyyatdan keçirilib və ona Agentlik tərəfindən müəlliflik hüququna dair şəhadətnamə verilib.
Yaxın günlərdə “ASAN Radio” - 100 FM-də layihənin təqdimatı keçiriləcək. Veriliş nazirliyin və ASAN Radionun “facebook” səhifələrində canlı yayımlanacaq.
İki həftə ərzində “ASAN Radio”da albomda olan musiqi nömrələri səsləndiriləcək, geniş dinləyici auditoriyasına təqdim ediləcək.
Qeyd edək ki, bundan əvvəl nazirlik tərəfindən əlilliyi olan şəxslərin yaradıcılıq uğurları barədə məlumatları əhatə edən 280 səhifəlik “Əlillik qüsur deyil” kitab-albomu hazırlanaraq Azərbaycan və ingilis dillərində nəşr etdirilib, görmə imkanları məhdud şəxslərin şeirlərindən ibarət “Zülməti dələn işıq” kitabı dərc olunub. Əlilliyi olan insanların çalışdığı “ƏSA” Teatrı ilə əməkdaşlıq çərçivəsində bir sıra tamaşalar hazırlanaraq təqdim edilib.
Bölmənin digər xəbərləri
