“Elmi kadrlar” Milli İnformasiya Sistemi təqdim olunub
Bakı, 28 yanvar, AZƏRTAC
Yanvarın 28-də AMEA-nın İnformasiya Texnologiyaları İnstitutunda “Elmi kadrlar” Milli İnformasiya Sisteminin təqdimatı və elmi müəssisələrin vəzifələri ilə bağlı təlim seminarı keçirilib.
İnstitutdan AZƏRTAC-a bildirilib ki, tədbirdə AMEA-nın vitse-prezidenti, institutun direktoru, akademik Rasim Əliquliyev çıxış edərək bu sistemin Prezident İlham Əliyevin “Azərbaycan Respublikasında elmi və elmi-pedaqoji kadrların attestasiyasının aparılması işinin təkmilləşdirilməsi ilə bağlı əlavə tədbirlər haqqında” 2018-ci il 10 dekabr tarixli Sərəncamına əsasən yaradıldığını bildirib. Qeyd edib ki, AMEA-da elmi fəaliyyətin mövcud potensiala uyğun monitorinqi və proqnozlaşdırılması, analitik və statistik təhlillər aparılması, elektron hesabat formalarının hazırlanması, elmi informasiyanın əlçatanlığının təmin edilməsi və s. məsələlər elmi kadrlar haqqında vahid elektron informasiya sisteminin yaradılmasını zəruri edib. Bu, bir sıra dövlət sənədlərində, o cümlədən “Elm haqqında” Azərbaycan Respublikasının Qanununda öz əksini tapıb.
Milli İnformasiya Sisteminin AMEA prezidentinin 2019-cu il 12 mart tarixli Sərəncamına əsasən İnformasiya Texnologiyaları İnstitutunun mütəxəssisləri tərəfindən işlənildiyini vurğulayan R.Əliquliyev onun pilot layihə kimi uğurla icra olunduğunu bildirib. İnstitut direktoru sistemin istismarını həyata keçirən administrator və istifadəçilər üçün təlimatlar hazırlandığını və AMEA-nın bütün elmi qurumlarında tətbiqinin nəzərdə tutulduğunu söyləyib. Alim informasiya sisteminin akademiya üzrə elmi fəaliyyətlə məşğul olan kadrlar haqqında məlumatların yer aldığı mühüm baza olacağını vurğulayıb. Qeyd edib ki, hazırda sistemin AMEA Rəyasət Heyəti aparatının Kadrlar və hüquqi təminat şöbəsinə təhvil verilməsi istiqamətində sənədləşdirmə işləri aparılır.
R.Əliquliyev Milli İnformasiya Sisteminin AMEA və digər müvafiq qurumlarda formalaşan elektron elmin tərkib hissəsi olduğunu qeyd edərək, sistem üzrə görülən işlərin Azərbaycan Respublikası Prezidenti Administrasiyasının müvafiq qurumları və AMEA rəhbərliyinin nəzarəti altında icra olunduğunu bildirib.
Daha sonra institutun Tədris-İnnovasiya Mərkəzinin əməkdaşı, proqramçı Raqif İsmayılov “Elmi kadrlar” Milli İnformasiya Sistemini təqdim edib.
Məruzəçi sistemin giriş formasının strukturunu diqqətə çatdıraraq, onun şəxsi məlumatlar, elmi əsərlər, kitablar, monoqrafiyalar, dərsliklər və dərs vəsaitləri, elmi ekspertiza fəaliyyəti, patentlər və ixtiralar, qrant layihələrində iştirak, kadr hazırlığı, eləcə də respublika üzrə və xarici ölkələrin elmi qurumlarında təmsil olunma və əlaqə məlumatları bölmələrindən ibarət olduğunu deyib. Bildirib ki, elmi işlər, elmi və elmi-pedaqoji işçilər haqqında informasiya resurslarının, elmi tədqiqatlar haqqında məlumat bazasının formalaşdırılması, elmi fəaliyyətin qiymətləndirilməsi və monitorinqi sahəsində idarəetmənin və tənzimləmənin təkmilləşdirilməsi, eləcə də təşkilatlar üzrə elmi fəaliyyətin monitorinqi və qiymətləndirilməsinin aparılması sistemin əsas prioritet istiqamətlərindəndir. Sistem elmmetrik və analitik qiymətləndirmələr aparılması, müxtəlif kombinasiyalı sorğular əsasında hesabatların əldə olunması və elektron hesabat formalarının hazırlanması baxımından da əhəmiyyət kəsb edir.
Sonra AMEA Rəyasət Heyəti aparatının Kadrlar və hüquqi təminat şöbəsinin müdiri Rzaqulu Hacıyev sistemin kadr işinin səmərəli şəkildə qurulması baxımından önəmini qeyd edib.
Tədbirdə təqdimata dair geniş fikir mübadiləsi aparılıb, suallar cavablandırılıb.
Müzakirələrdə Şərqşünaslıq İnstitutunun direktor müavini, akademik Şahin Mustafayev, Zoologiya İnstitutunun direktoru vəzifəsini icra edən professor Elşad Əhmədov, Radiasiya Problemləri İnstitutunun direktor müavini Rəvan Mehdiyeva, Molekulyar Biologiya və Biotexnologiyalar İnstitutunun direktor müavini Ələmdar Məmmədov, Genetik Ehtiyatlar İnstitutunun direktor müavini Mehrac Abbasov, Şamaxı Astrofizika Rəsədxanasının direktor müavini Xıdır Mikayılov, Elm Tarixi İnstitutunun elmi katibi Zaur Əliyev və digərləri iştirak ediblər.
Bölmənin digər xəbərləri
