Emil Qədirov: Mən Müslüm Maqomayevin sayəsində oxumağa başladım
Moskva, 25 oktyabr, AZƏRTAC
“Müslüm Maqomayev Azərbaycanın rəmzidir. Onun səsi dünya miqyasında məşhurdur, həm opera, həm də estrada müğənnilərinin çoxu öz səslərini bu səsə uyğunlaşdırmağa çalışır. Mən bu səsin sayəsində oxumağa, yaradıcılığa başladım”.
Azərbaycanın və Rusiyanın tanınmış müğənnisi Emil Qədirov bu sözləri Müslüm Maqomayevin xatirə günündə AZƏRTAC-ın müxbiri ilə söhbətində söyləyib.
E.Qədirov öz yaradıcılıq planları barədə də söhbət açaraq qeyd edib ki, noyabrın 17-də Qradski Hollda onun solo konserti olacaq. Müğənni deyib: “Mən Aleksandr Qradski teatrının solistiyəm. Noyabrın 17-si axşamı mənim konsertim olacaq. Simfonik orkestrin müşayiəti ilə müxtəlif janrlara aid mahnılar səslənəcək. Gələn il dekabr ayında isə Kreml sarayının səhnəsində solo konsertim olacaq. Bu konsert iki hissədən ibarətdir. Birinci hissədə klassik musiqi səslənəcək, ikinci hissədə isə özümün bəstələdiyim mahnıları ifa edəcəyəm. Düşünürəm ki, iki müxtəlif planlı proqramlar tamaşaçılar üçün maraqlı olacaq”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
