“Ənənəvi Çin mədəniyyətində bambuk simvolizmi” - seminar
Bakı, 29 dekabr, AZƏRTAC
Azərbaycan Dillər Universitetinin (ADU) Konfutsi İnstitutunda “Ənənəvi Çin mədəniyyətində bambuk simvolizmi” adlı tələbə seminarı keçirilib.
ADU-dan AZƏRTAC-a bildirilib ki, seminarda çıxış edən Konfutsi İnstitutunun direktoru Rafiq Abbasov Çin mifologiyası və folklorunda davamlılıq, çeviklik, müdriklik və gözəllik rəmzi olan bambukun qədim istifadə tarixinə malik olduğunu deyib. R.Abbasov çıxışında bambuk monoxrom rəngkarlığının xüsusiyyətlərindən, bu janrın banisi, məşhur filosof və xəttat Ven Tonqun əsərlərindən, həmçinin gavalı çiçəkləri, səhləb və xrizantemalarla yanaşı, "zadəgan insan" obrazını əks etdirən bambuk simvolizmindən bəhs edib. O, Çin mədəniyyətində dostluq, sülh və harmoniya rəmzi olan, ölkənin simvolu hesab edilən pandaların qorunmasında bambukun böyük əhəmiyyət daşıdığını bildirib.
ADU-nun çinşünas tələbələri Çin dekorativ-tətbiqi sənətinin elementi kimi bambukun toxuculuqda, qədim kitabların yazılmasında, körpülər və dam örtüklərinin qurulmasında, mebel və geyimlərin hazırlanmasında material kimi istifadə olunması barədə danışıblar. Qeyd olunub ki, bambuk tumurcuqları Çin yeməklərinin və ənənəvi təbabətin mühüm tərkib hissəsidir, onlardan məşhur bambuk fleytalar və Çin atəşfəşanlığı üçün ilk fişənglərin hazırlanmasında da istifadə edilib.
Tədbirin sonunda bambukla bağlı Çin deyimlərinə dair bilik viktorinası keçirilib.
Bölmənin digər xəbərləri
