AZƏRTAC xəbər verir ki, “Novosti” agentliyinin yaydığı məlumata görə, Ermənistan Prezidenti Robert Koçaryan və parlamentin elm və təhsil komissiyasının sədri Qranuş Akopyan “Mətbuatın düşmənləri” adlandırılmışlar.

Ermənistan Milli Mətbuat Klubunun məlumatında bildirilir ki, klub üzvlərinin illik səsverməsinin nəticələrinə əsasən, onların hər ikisi eyni miqdarda səs toplamışdır.

Ermənistan Prezidenti bu ada dalbadal üçüncü ildir “layiq” görülür. Bu dəfə o, jurnalistlərin hüquqlarını tapdalayan və söz azadlığını pozan “Kütləvi informasiya haqqında” qanunu təsdiq etdiyinə görə “Mətbuatın düşməni” elan olunmuşdur.

Akopyan “Kütləvi informasiya haqqında” qanuna lobbilik etdiyinə və bu qanunu beynəlxalq qurumların guya müsbət qiymətləndirdiyi barədə parlament üzvlərinə yalan məlumat verdiyinə görə “düşmən” səslər toplamışdır.