Ermənistan prezidentinin Berlinə səfəri etirazla qarşılandı
Bakı, 6 aprel, AZƏRTAC
Aprelin 6-da Ermənistan prezidenti Serj Sarkisyanın Almaniyaya səfəri ilə əlaqədar etiraz etmək üçün Berlində Avropa Azərbaycan Cəmiyyətinin (TEAS) Almaniya ofisinin təşkilatçılığı, Azərbaycan Tələbə Şəbəkəsi, Azərbaycan Evi, Almaniyadakı Azərbaycanlıların Koordinasiya Mərkəzinin fəallarının dəstəyi ilə Federal Kanslerin qərargahı (Bundeskanzleramt) qarşısında aksiya keçirilib.
TEAS-dan AZƏRTAC-a bildiriblər ki, tədbirdə türk və gürcü diasporlarının nümayəndələri də iştirak ediblər.
Nümayiş iştirakçıları beynəlxalq ictimaiyyəti Ermənistanı işğal olunmuş Azərbaycan ərazilərindən çıxmağa və BMT Təhlükəsizlik Şurasının dörd qətnaməsini yerinə yetirməyə məcbur etməyə çağırıblar. Həmçinin Azərbaycan torpaqlarından çıxmayana qədər Ermənistana qarşı sanksiyaların tətbiq edilməsi tələb olunub. Aksiya iştirakçıları federal kansler Angela Merkelin erməni təcavüzünün əsas təşəbbüskarlarından biri və Xocalı qırğınına görə məsuliyyət daşıyan bir şəxslə görüşünə etirazlarını bildiriblər.
TEAS-ın Almaniya ofisinin direktoru Şahin Namati-Nasab kansler Angela Merkelə məktub hazırlayaraq ona Ermənistanın Birləşmiş Millətlər Təşkilatının 1993-cü ildə qəbul etdiyi, Azərbaycanın ərazi bütövlüyünü təsdiq edən və Ermənistanı ərazidən çıxmağa və hərbi əməliyyatları dayandırmağa çağıran dörd qətnaməsinə qarşı hörmətsiz yanaşmasını xatırladıb.
Serj Sarkisyanın Berlində qəbul edilməsi Ermənistanın Azərbaycanın mövqelərinə, həmçinin bir milyondan artıq qaçqın və məcburi köçkün üçün yeni salınmış qəsəbələr də daxil olmaqla, bir çox böyük yaşayış məntəqələrinin hərbi hücuma məruz qalmasından dörd gün sonra baş tutub. Hücumlar Ermənistanın BMT Təhlükəsizlik Şurasının dörd qətnaməsi və Avropa Parlamentinin, Bundestaqın, digər beynəlxalq təşkilatların qətnamələrinə məhəl qoymayaraq işğal etdiyi Azərbaycan torpaqlarından başlanıb. Azərbaycan isə təcavüzə hərbi yolla cavab vermək məcburiyyətində qalıb. Beynəlxalq müraciətlərə cavab olaraq Azərbaycan aprelin 3-də birtərəfli olaraq atəşi dayandırıb, lakin Ermənistan mülki yaşayış məntəqələrini atəşə tutmaqda davam edir.
Dağlıq Qarabağ və Azərbaycanın yeddi ətraf rayonu 20 ildən çoxdur ki, Ermənistan tərəfindən işğal edilib. Bu münaqişə nəticəsində otuz min insan həlak olub, kütləvi etnik təmizləmə nəticəsində bir milyon azərbaycanlı doğma torpağından qovulub. Müharibənin ən dəhşətli vəhşiliyi erməni qüvvələrinin Xocalı şəhərinin işğalı nəticəsində 613 Azərbaycan vətəndaşını qətlə yetirməsi olub. Serj Sarkisyan həmin qüvvələrin komandiri idi. ATƏT-in Minsk qrupunun 22 il ərzində apardığı vasitəçilik səylərinə baxmayaraq, ümumilikdə Azərbaycanın 20 faiz ərazisi hələ də Ermənistanın işğalı altındadır.
Sonuncu hücumlar Minsk qrupunun həmsədr ölkələrinin münaqişənin danışıqlar vasitəsilə həlli yolunun tapılması ilə bağlı aydın şəkildə bəyan edilmiş mövqelər əsasında yeni yanaşmalar və ideyalar təklif etdiyi bir vaxtda başlayıb. ABŞ-da Nüvə Təhlükəsizliyi Sammiti keçirilən zaman hər iki tərəfə münaqişənin sülh yolu ilə həll edilməsinə dair yüksək səviyyədə mesajlar verilib. Belə bir zamanda böyük hücum bütün regionda sülh prosesini və sabitliyi pozmaq təhlükəsi yaradır.
Bölmənin digər xəbərləri
