ERMƏNİSTAN XARİCİ İŞLƏR NAZİRİNİN BƏYANATI TÜRKİYƏDƏ İSTEHZA İLƏ QARŞILANMIŞDIR

20.10.2004 [15:43]
Çap et
A⁺ A^-

Oktyabrın 19-da Türkiyənin kütləvi informasiya vasitələri İtaliyada rəsmi səfərdə olan Ermənistanın xarici işlər naziri Vartan Oskanyanın bəyanatını yayımlamışdır. V.Oskanyan Romadakı Xarici Mətbuat Mərkəzində “Cənubi Qafqaz: bölgədə sabitlik və təhlükəsizlik” mövzusunda konfransda çıxış etmişdir. Ermənistan naziri bildirmişdir ki, onun ölkəsi Türkiyənin Avropa Birliyi üzvlüyünə qəbul olunmasına etiraz etmir. Ancaq o, Türkiyədən Ermənistanla sərhədin açılmasını, erməni “soyqırımının” tanınmasını və Kipr məsələsinin həllini gözləyir. Oskanyan həmçinin demişdir: “Ermənistan ruhən Avropa ölkəsidir. Avropa standartlarına uyğun bir çox addımlar atmışdır. Türkiyə isə Avropa standartlarına cavab vermir. Avropa Birliyinin yeni sərhədləri Ermənistanı da əhatə etməlidir.”

Ermənistan nazirinin bu bəyanatı Türkiyədə istehza ilə qarşılanmışdır. Siyasətçilər və şərhçilər erməni nazirinin bu bəyanatının gülünc olduğunu vurğulayaraq bildirirlər ki, Ermənistanın Avropa Birliyi adından danışmağa heç bir hüquqi və mənəvi haqqı yoxdur. İqtisadi böhranla yanaşı, mütəmadi siyasi böhranlarla üzləşən, tarixi həqiqətləri saxtalaşdıran, işğalçı siyasətindən çəkinməyən, digər dövlətlərdən asılı vəziyyətdə yaşamağa möhtac qalan Ermənistanın Türkiyə ilə müqayisə olunması isə cəfəngiyatdır.

Ermənistan naziri bəyanatında Türkiyənin AB üzvlüyünə qəbul edilməsinin əleyhinə olmadığını söylədiyi bir vaxtda Brüsseldə erməni deputatlar Avropa Birliyi nümayəndələri ilə görüşərək, Türkiyəni bu təşkilata qəbul etməməsi üçün geniş təbliğat kampaniyası aparırdı. Onlar hətta Avropa Birliyinin üzvü olan 25 ölkənin dövlət və hökumət başçılarına məktub göndərərək, Türkiyənin erməni “soyqırımını” tanımadığı təqdirdə onun bu təşkilata qəbul olunmamasını xahiş etmişlər.

ERMƏNİSTAN XARİCİ İŞLƏR NAZİRİNİN BƏYANATI TÜRKİYƏDƏ İSTEHZA İLƏ QARŞILANMIŞDIR

MÜƏLLİFLƏ ƏLAQƏ

Bölmənin digər xəbərləri