SİYASƏT
Ermənistanın Gürcüstandakı səfirliyi qarşısında etiraz aksiyası keçirilib
Tbilisi, 30 dekabr, AZƏRTAC
Gürcüstanda yaşayan bir qrup azərbaycanlı dekabrın 30-da Ermənistanın Tbilisidəki səfirliyinin qarşısında etiraz aksiyası keçirib.
AZƏRTAC xəbər verir ki, mitinq iştirakçıları Azərbaycanın işğal altındakı Dağlıq Qarabağ bölgəsində keçirilən qanunsuz “məhkəmə”nin ermənilər tərəfindən girov götürülmüş Dilqəm Əsgərov və Şahbaz Quliyevlə bağlı “qərarı”na etiraz edib, onların azadlığa buraxılmalarını, eləcə də erməni silahlı birləşmələrinin işğal etdikləri Azərbaycan torpaqlarından geri çəkilmələrini tələb ediblər.
Əllərində Azərbaycan bayraqları, Dilqəm Əsgərovun və Şahbaz Quliyevin şəkillərini və digər plakatlar tutan aksiya iştirakçıları səfirliyin binası qarşısında “Sarkisyan faşistdir!”, “Ermənilər faşist və terrorçudurlar”, “Azərbaycan torpaqlarını tərk edin!”, “Girovları azad edin!” şüarlarını səsləndiriblər.
Sonra səfirliyə bəyanat təqdim olunub.
Aksiya iştirakçıları daha sonra Tbilisinin mərkəzi küçələrindən biri olan Marcanaşvili küçəsində eyni şüarları səsləndirərək yürüş keçiriblər.
Aksiya insidentsiz başa çatıb.
Şəhər sakinləri Ermənistanın bu hərəkətini pisləyiblər.
Sakin İrina Kolakidze AZƏRTAC-a müsahibəsində deyib: “Bizim Bakıda çoxlu dostlarımız var. Çox təəssüf ki, azərbaycanlılara qarşı bu cür ədalətsizliklər baş verir. Sadə vətəndaşlara qarşı törədilən hərbi cinayətlər bağışlanmamalıdır. Mənim də atam hərbiçi olub. Ailəsini, Vətənini sevən insan başqalarına qarşı qəddar ola bilməz, bu bağışlanılmaz cinayətdir”.
Erməni vəhşiliklərinə etirazını bildirən daha bir sakin Emzar Siukaev deyib: “Ermənistan Azərbaycan torpaqlarını işğal edib, azərbaycanlılara qarşı ağlasığmaz qətliamlar törədilib. Cinayətkarlar öz layiqli cəzalarını almalıdırlar. Biz qəlbən sizinləyik və sizi dəstəkləyirik”.
“Biz burada yaşasaq da daim ürəyimiz Azərbaycanla döyünür. Ermənistan dövlətinin başında oturanların siyasəti nəticəsində xalqlar min bir əziyyət çəkirlər. Bu cür özbaşınalıqlara son qoyulmalıdır”.
Bu fikirləri isə soydaşımız Minayə Əliyeva söyləyib.
Bir vaxtlar Bakıda yaşamış, hazırda isə Gürcüstan vətəndaşı olan Gülnara Mkrtçyan Ermənistan hakimiyyətinin törətdiyi cinayətləri qətiyyətlə pisləyib: “Mən baş verənləri ürək ağrısı ilə izləyirəm. Erməni siyasətçilərinin alçaldıcı hərəkətlərinə görə xəcalət çəkirəm. Necə deyə bilərəm ki, Ermənistan hakimiyyəti düz edir? İnsanlığa yaraşmayan, ağır cinayətlər törədən siyasətçilərin əməllərinə necə qiymət vermək olar? Azərbaycan torpaqları geri qaytarılmalıdır, girov və əsir götürülmüş, eləcə də qondarma məhkəmə prosesi nəticəsində azadlıqdan məhrum edilmiş şəxslər azadlığa buraxılmalıdırlar”.
Tbilisi şəhər sakini Cunsani Canelidze də erməni vəhşiliyini birmənalı şəkildə pisləyib: “Aksiya iştirakçılarının tələbləri haqlı tələbdir. Hamı sülh şəraitində yaşamalıdır. Hamı, xüsusən də ermənilər bunu yaxşı başa düşməlidirlər”.
Dilqəm Əsgərovun oğlu Kürdoğlu Əsgərov AZƏRTAC-a müsahibəsində deyib: “Mən Ermənistan silahlı qüvvələri tərəfindən işğal olunmuş Kəlbəcər rayonundanam. Atam da öz dostu ilə ata-babasının qəbirlərini ziyarət etməyə gedib. Erməni əsgərləri onları öz torpaqlarımızda girov götürüblər. İşgəncə altında onlardan ifadə alıblar. Onların heç bir günahı yoxdur”.
Bavariyadakı Azərbaycan Diaspor Mərkəzinin rəhbəri Akif Məmmədov isə deyib: “Mən yalnız bu aksiyaya görə Almaniyadan Gürcüstanın paytaxtına gəlmişəm. Biz bundan sonra bu cür aksiyaları Moskvada, Avropa ölkələrində, Strasburqa İnsan Haqları Məhkəməsinin qarşısında da keçirəcəyik. Həmin məhkəmənin qarşısında çadır qurmağı və aclıq aksiyası keçirməyi planlaşdırırıq”.
Xətayi Əzizov
AZƏRTAC-ın xüsusi müxbiri
Tbilisi