Ermənistanın müdafiə naziri dəyişdirilib
Bakı, 15 noyabr, AZƏRTAC
Ermənistan prezidenti Armen Sarkisyan baş nazir Nikol Paşinyanın təklifi ilə Arşak Karapetyanı müdafiə naziri vəzifəsindən çıxararaq onun yerinə baş nazirin müavini Suren Papikyanı təyin edib.
AZƏRTAC xarici KİV-lərə istinadla xəbər verir ki, bu barədə Ermənistanın prezident aparatı məlumat yayıb.
“Prezident Armen Sarkisyan baş nazirin təklifini əsas götürərək Arşak Karapetyanın müdafiə naziri vəzifəsindən azad edilməsi haqqında fərman imzalayıb. Prezidentin digər sərəncamına əsasən, Suren Papikyan baş nazirin müavini postundan azad edilərək müdafiə naziri təyin edilib”, - deyə məlumatda bildirilir.
Qeyd edək ki, Arşak Karapetyan Ermənistanın müdafiə naziri vəzifəsinə bu il avqust ayının əvvəlində təyin edilmişdi. Baş nazir Nikol Paşinyanın ən yaxın adamlarından biri sayılan Suren Papikyan, eyni zamanda, hakim “Vətəndaş sazişi” partiyasının sədridir.
Ermənistan Nazırlər Kabinetinin məlumatına görə, baş nazir bu qərarı Azərbaycanla sərhəddə yaranmış vəziyyət səbəbindən qəbul edib.
Bölmənin digər xəbərləri
